Три нови видови дневно
Од април 2025 до март 2026 година, истражувачите откриле вкупно 1.121 морски вид кој досега не ѝ бил познат на науката. Тоа значи дека во просек секој ден биле документирани по три нови видови, што претставува најголем резултат од почетокот на меѓународната иницијатива Ocean Census.
Во проектот учествуваат повеќе од 1.500 научници од бројни истражувачки институции ширум светот. Програмата во 2023 година ја започнаа Фондацијата Nippon и истражувачкиот институт Nekton, со поддршка од Обединетите нации преку Декадата на науката за океаните за одржлив развој, пренесува OceanoGraphic.
Истражувања од Арктикот до најголемите океански длабочини
Во текот на изминатата година биле организирани 13 научни експедиции во соработка со водечките светски истражувачки институции. Експедициите ги опфатиле подрачјата од Арктикот и Пацификот до Индискиот и Јужниот Океан, вклучувајќи и длабочини поголеми од 6.500 метри.
Во споредба со претходниот период, бројот на откриени видови е зголемен за 54 проценти, што ја прави оваа година најуспешна од основањето на програмата.
Меѓу откритијата и „ајкула-дух“ и необични длабокоморски организми
Новооткриените видови покажуваат колку е разновиден животот во океаните. Меѓу нив се наоѓа и таканаречената ајкула-дух, далечен сродник на ајкулите и ражите, која живее во длабочините на Коралното Море.
Научниците покрај брегот на Јапонија пронашле и ситен повеќечетинест црв кој живее во внатрешноста на стаклести длабокоморски сунѓери, додека во водите околу Јужните Сендвички Острови бил откриен необичен месојаден сунѓер кој со помош на ситни структури слични на куки ги фаќа и вари ракчињата.
Покрај брегот на Источен Тимор биле идентификувани и нови видови немертини (силно издолжени и сплескани црви), чии токсини го привлекуваат вниманието на истражувачите поради нивниот можен потенцијал во развојот на терапии за заболувања како што се Алцхајмеровата болест и шизофренијата.
Дури 90 проценти од морските видови сè уште не се откриени
Иако бројот на нови откритија е импресивен, научниците проценуваат дека дури 90 проценти од видовите што живеат во океаните сè уште не се документирани. Поради климатските промени, загадувањето и сè поголемиот притисок врз длабокоморските екосистеми, постои стравување дека некои видови би можеле да исчезнат пред воопшто да бидат откриени.
„Во трка сме со времето за да го разбереме и заштитиме животот во океанот пред да го изгубиме“, порача д-р Мишел Тејлор, директорка на научниот тим на програмата Ocean Census. Како што истакнува таа, забрзувањето на процесот на откривање нови видови и јавното споделување на податоците се клучни за донесување идни одлуки за заштита на океаните.
Сличен став има и Јохеи Сасакава, претседател на Фондацијата Nippon, кој нагласува дека собраните податоци ќе претставуваат важна основа за зачувување на морските екосистеми и за идните научни истражувања.
Целта е откривање 100.000 нови видови
Идентификацијата на нови видови некогаш траела и по неколку децении, но Ocean Census денес користи технологии како снимање со висока резолуција, секвенционирање на ДНК и машинско учење за значително да го забрза тој процес.
Амбициозната цел на проектот е во текот на првите десет години да документира дури 100.000 нови морски видови, создавајќи ја најголемата отворена база на податоци за биолошката разновидност на океаните досега.
„Трошиме милијарди долари во потрага по живот на Марс или истражувајќи ја темната страна на Месечината. Откривањето на најголемиот дел од животот на нашата планета, во океаните, чини само мал дел од таа сума. Прашањето не е дали можеме да си го дозволиме тоа, туку дали можеме да си дозволиме да не го направиме“, порача Оливер Стидс, директор на проектот Ocean Census.
Извор: odrzime.rs
