Иако бара малку повеќе труд од отворање кесичка купечки чипс, резултатот е неспоредливо повкусен. Рецептот е идеален за домашни забави, дружења со пријателите или опуштени вечери со омилениот филм.
За подготовка се потребни околу 20 минути, додека за готвење и печење се потребни дополнителни 40 минути. Вкупното време за подготовка изнесува 60 минути, а рецептот е доволен за пет порции.
Состојки
- компири
- тиквички
- брашно
- растително масло
- издробена горгонзола
- крцкаво испечена сланина
- свеж магдонос
- крупна морска сол
Подготовка
Компирите измијте ги, излупете ги и исечете ги на многу тенки кругови, најдобро со помош на мандолина. Веднаш префрлете ги во голем сад со ладна вода за да не потемнат.
Тиквичките исечете ги на еднакво тенки кругови. Ставете ги во сад, посипете ги со остро брашно и добро измешајте за брашното рамномерно да го обложи секое парче.
Исцедете ги компирите и внимателно исушете ги меѓу слоеви хартиени бришачи. Овој чекор е многу важен бидејќи влажните компири може да предизвикаат прскање на жешкото масло.
Во длабоко тенџере загрејте го маслото на 175 степени. Пржете ги компирите во помали тури четири до пет минути, додека не станат крцкави и златнокафеави. Вадете ги со решеткаста лажица и ставајте ги на хартиена салфетка за да го впие вишокот маснотија. Веднаш малку посолете ги.
Истата постапка повторете ја и со тиквичките. Внимателно спуштајте ги во маслото една по една за да не се залепат. Пржете ги три до четири минути, внимавајќи да не потемнат премногу бидејќи тогаш може да станат горчливи.
Загрејте ја рерната на 175 степени. Кога чипсот малку ќе се излади, распоредете го на плех, посипете го со издробената горгонзола и печете околу пет минути, односно додека сирењето не се растопи.
Извадете го од рерната, посипете со ситно исечкана крцкава сланина и сечкан магдонос, па веднаш послужете.
Совет за послужување
Овој богат домашен чипс одлично се комбинира со едноставен сос од кисела павлака или грчки јогурт. Додајте малку власец, лук во прав и прстофат сол за да добиете совршен баланс на вкусови што ќе ги ублажи интензивните ноти на горгонзолата и сланината.
Извор: easylife.rs
