Соларните ќелии овозможуваат директно полнење на паметните телефони
Под водство на професорот Кванјонг Сео, тимот од одделот за енергетика и хемиско инженерство при UNIST разви иновативни транспарентни соларни ќелии (TSC) кои овозможуваат директно полнење на уредите преку сончевата светлина.
Оваа технологија користи проѕирни површини, како што се стаклата на зградите, автомобилите или екраните на мобилните уреди, за да генерира енергија. Тоа значи дека екраните на паметните телефони ќе можат да служат како извор на напојување, овозможувајќи им да се полнат со едноставно изложување на сонце.
Проѕирните соларни ќелии ќе ја зачуваат естетиката
Најголемиот предизвик во развојот на транспарентни соларни ќелии досега беше нивниот неестетски изглед — видливи метални жици и непрозирни елементи кои ја нарушуваа функционалноста и дизајнот на уредите. Меѓутоа, тимот од UNIST го реши овој проблем со воведување на технологијата наречена „all-back-contact“ (ABC), каде сите електрични контакти и компоненти се сместени на задната страна на соларната ќелија. Овој иновативен пристап овозможува ќелиите да бидат целосно проѕирни, без нарушување на визуелниот изглед на стаклените површини, додека истовремено ја задржуваат високата ефикасност во претворање на сончевата енергија во електрична.
„Овој ABC дизајн овозможува постигнување на високи перформанси во комбинација со естетски решенија, што е од клучна важност за примена на соларните ќелии во секојдневните уреди,“ објаснува професорот Сео, објавено на порталот на Универзитетот UNIST.
Тимот успеа да развие транспарентни соларни модули со големина од 16 cm², кои постигнуваат ефикасност од 20% до 14,7% во зависност од проѕирноста. Оваа технологија не само што овозможува полнење на паметните телефони директно преку сончевата светлина, туку успешно ја демонстрираше можноста за примена во згради, автомобили и помали електронски уреди. Користејќи природна сончева светлина, тимот успешно наполни паметен телефон користејќи ја оваа технологија.
„Нашата технологија ги решава естетските и функционалните предизвици со кои се соочуваа претходните генерации на соларни ќелии. Овозможивме транспарентните соларни ќелии да станат неприметни, а истовремено високо ефикасни,“ рече истражувачот Џонгхван Парк.
Нови можности со ABC соларни модули
Новите ABC соларни модули нудат значајни можности за поширока примена, вклучувајќи мали мобилни уреди, згради и стакла на автомобили. Замислете дека екраните на вашите мобилни телефони генерираат енергија додека се изложени на светлина, со што се намалува потребата од класични полначи и се отвора патот кон поодржливи начини на користење на енергијата.
„Оваа студија покажува огромен потенцијал на транспарентните соларни ќелии од силициум, не само во индустријата на мобилни уреди, туку и во градежништвото, автомобилската индустрија и многу други сектори,“ додаде истражувачот Кангмин Ли.
Извор: Web-mind.rs
