Прашањето е: дали терминот „изгуглај“, односно Google search, полека оди во заборав? Дали сè повеќе луѓе веќе не се информираат преку Google, туку преку AI чат-ботови? Корисниците на интернет сè помалку гуглаат за работите што ги интересираат, а сè повеќе ги прашуваат ChatGPT, Gemini, Copilot, Perplexity и многу други алатки што постојано се усовршуваат. За разлика од Google, тие не нудат листа со линкови, туку обезбедуваат конкретен, директен одговор, во форма на разговор со корисникот, често проследен со релевантни извори.
Но тука не завршува приказната. Оваа нова реалност на растечко користење на АИ-прегледи отвора нови поглавја и за медиумските куќи. Според најновите истражувања, сообраќајот кон реномирани новински веб-страници веќе е намален за една третина на глобално ниво за само една година. Поновите податоци за повеќе од 2.500 новински сајтови, обезбедени од Chartbeat, потврдуваат дека пребарувањата преку Google глобално се намалени за 33%, а бројката е уште поголема во САД.
Извор: Freepik
Дали новинарите треба да станат креатори на видео содржини, налик на оние на TikTok и YouTube? Колку и да звучи небулозно, „инфлуенсерски“ и како поткопување на новинарството какво што го знаеме, изгледа како тоа да е на повидок. Според извештајот на Reuters Institute, медиумските компании сè повеќе инвестираат во дигитални платформи како YouTube и TikTok, додека употребата на кратки видеа продолжува да расте. Многу од нив веќе се обидуваат да ги поттикнат своите новинари да ја прифатат културата на креаторите на содржини што произлезе од овие платформи.
Брзото консумирање вести и информации веќе подолго време е новата реалност што ја преферира Генерацијата Z. Кратките текстови (максимум едноминутно читање) кратките видеа, персонализирани четови и новата скрол-култура ќе донесат промена на парадигмата во дигиталниот новинарски свет. Но засега, сепак не можеме да се потпреме целосно на AI кога се во прашање веродостојни, дневни вести, експертски анализи, дебати и истражувања, и секако човечкиот storytelling.
