Одговорот на тоа прашање се наоѓа во новата голема кампања, која ја повикува следната генерација да ја преземе штафетата и да ја продолжи приказната на „Just Do It“. Во момент кога брендот минува низ значајна трансформација, Nike сака да ги инспирира младите спортисти да го испишат следното поглавје од неговата историја.
Кампањата „Why Do It?“, создадена од агенцијата Wieden+Kennedy Portland, беше лансирана на 4 септември, во периодот кога започнуваат многу спортски сезони. Во рекламата се појавуваат спортисти од различни дисциплини – кошарка, фудбал, бејзбол, тенис, нуркање и атлетика.
Во разновидната, глобална постава се наоѓаат Кејтлин Кларк, Карлос Алкараз, Сејкон Баркли, Леброн Џејмс, Рејса Леал и Ќинвен Џенг. Секој од нив се соочува со сопственото прашање за смислата и мора да одговори: „Why Do It?“
Со овој свеж пристап Nike ја менува перспективата – величината не ја прикажува како однапред зададен исход, туку како свесен избор. Кампањата зборува на јазикот на младата генерација која, според Nike, често чувствува „страв од перфекционизам“ и се двоуми да се впушти во игра.
„Кога разговараме со младите спортисти, гледаме дека тоа е вистински лонец под притисок – постојано споредување, стремеж кон совршенство, страв од неуспех, па дури и од самото обидување,“ изјави Николa Грејам, извршна потпретседателка и главна директорка за маркетинг во Nike, за Adweek.
Филмот ги прикажува спортистите не во момент на триумф, туку во мигот кога одлучуваат да ризикуваат: да шутираат топка, да замавнат со палка или да скокнат од даска.
„Целата идеја зад ‘Why Do It?’ е во тоа да го направиш тој прв чекор и навистина да се обидеш,“ додаде Грејам. „Сакавме да им дадеме глас на тие сомнежи, но и јасен одговор: направи го тоа и види што ќе се случи.“
Три драгоцени зборови
Откако Nike и Wieden+Kennedy во 1988 го лансираа „Just Do It“, тој стана еден од најпознатите слогани на сите времиња.
„Тоа се три многу драгоцени зборови за нас,“ вели Грејам. „Тие добиваа различни значења, во зависност од моментот и културниот контекст.“
Првиот спот го прикажуваше 80-годишниот тркач Волт Стак како џогира преку мостот Голден Гејт, пренесувајќи порака дека спортот е за секого.
Рекламата „If You Let Me Play“ од 1995 ја прошири таа порака на девојчињата и младите жени, прикажувајќи како спортот може да им го промени животот.
На 30-годишнината од слоганот, во 2018 година, Nike зазеде силен став ангажирајќи го Колин Каперник, поранешен NFL квотербек кој предизвика контроверзии со протестите против расната неправда, во рекламата „Dream Crazy“.
„Just Do It“ го отелотворија и легендарни спортисти како Мајкл Џордан, Серена Вилијамс, Тајгер Вудс и Коби Брајант, покажувајќи дека сè е можно кога ќе се појавиш и ќе се обидеш.
Повраток на релевантноста
Сепак, последниве години Nike се соочува со пад на продажбата и намалување на вредноста на брендот, борејќи се со конкуренција од старите ривали како Adidas, но и од нови брендови како On и Hoka, популарни меѓу генерацијата Z.
„Не бевме доволно јасни и фокусирани на нашите вредности,“ признава Грејам.
Затоа Nike во последните 18 месеци започна целосна маркетиншка трансформација.
Во ноември 2023 година компанијата ја врати Грејам, која претходно 17 години работеше во Nike пред да ја основа сопствената агенција, на позицијата CMO. Во октомври 2024 година беше вратен и ветеранoт Елиот Хил, кој ја презеде функцијата извршен директор наместо Џон Донахо.
На почетокот на 2025 година Nike објави дека годишниот приход му паднал за 10% во однос на претходната година, на 46,3 милијарди долари. Хил тогаш ја најави новата стратегија „Sport Offense“, која оди рака под рака со планот за пресврт „Win Now“ и подразбира фокусирање од „lifestyle“ маркетинг кон спортските перформанси.
Во рамки на реорганизацијата, Nike го подели работењето по спортови, наместо по машка, женска и детска категорија. Новите маркетиншки потези се насочени кон конкретни спортски заедници, големи спортски настани како Олимпијадата и Супербоулот, и приказни за спортистите.
Минатата година беше лансирана кампањата „Winning Isn’t Comfortable“ во чест на тркачите, а во февруари Nike по 27 години се врати на Супербоул со рекламата „So Win“, посветена на спортистките.
„Стратегијата фокусирана на спорт му носи вистински замав на работењето,“ вели Грејам.
„Како бренд се обидовме да потврдиме дека сме заљубени во победата — но победата е релативна, зависи од тоа што се обидуваш да направиш во животот. Нема права, линеарна патека; постојат многу начини да се стигне до целта,“ објаснува таа. „Оваа најнова кампања покажува дека победата, величината и потенцијалот всушност се прашање на избор.“
Извор: bizlife.rs
