Тужбата е поднесена во петокот до Окружниот суд за Северна Калифорнија, а Apple го товари OpenAI за неовластено присвојување деловни тајни и прекршување на договорни обврски.
Ова е првиот голем правен спор меѓу двете компании, кои пред само две години најавија соработка за интеграција на ChatGPT во уредите на Apple. Во меѓувреме, OpenAI започна таен проект за развој на AI хардвер заедно со поранешниот главен дизајнер на Apple, Џони Ајв, а првиот уред се очекува да биде претставен до крајот на годинава.
Сепак, новата тужба би можела сериозно да ги загрози тие планови, но и да го искомплицира очекуваното излегување на OpenAI на берза, кое се смета за едно од најочекуваните IPO-а во технолошкиот сектор.
Apple: Поранешни вработени однеле доверливи податоци
Меѓу обвинетите се OpenAI, инженерот Чанг Лиу, кој на почетокот на 2026 година го напуштил Apple и преминал во OpenAI, како и Танг Тан, поранешен директор за дизајн на производи за iPhone и Apple Watch, кој денес е задолжен за хардверот во OpenAI.
Во тужбата се споменува и компанијата io Products, основана од Џони Ајв по неговото заминување од Apple во 2019 година, а која OpenAI ја купи минатата година. Сепак, самиот Ајв не е обвинет и против него не се води постапка.
Apple тврди дека Лиу, при заминувањето од компанијата, одбил да ја помине стандардната процедура за напуштање на работното место, не ја потврдил обврската за доверливост и не го вратил службениот лаптоп. Според наводите во тужбата, по заминувањето пристапувал и до компјутерот на поранешен колега.
Компанијата наведува дека тој презел десетици доверливи документи поврзани со хардверот, меѓу кои информации за производи што сè уште не се јавно претставени, технички спецификации, инженерски презентации и интерни проектни податоци.
Apple исто така го обвинува Танг дека при регрутирање нови вработени барал кандидатите на разговорите да носат компоненти од Apple, како и дека заедно со OpenAI ги советувал вработените како да ја напуштат компанијата. Наводно, непосредно пред заминувањето си испраќал информации за добавувачите на Apple и за состаноците со деловните партнери.
Компанијата тврди дека постојат докази и дека повеќе други поранешни вработени во Apple понеле доверливи информации при преминувањето во OpenAI.
OpenAI ги отфрла обвинувањата
Портпаролот на OpenAI, Дру Пусатери, ги отфрли обвинувањата.
„Немаме никаков интерес за деловните тајни на други компании. Остануваме фокусирани на развој на иновативни технологии што им користат на луѓето ширум светот“, изјави тој.
Apple наведува дека уште за време на интерната истрага се обидел да стапи во контакт со OpenAI за да ја изрази својата загриженост, но никогаш не добил одговор.
Борба за доминација во ерата на вештачката интелигенција
Тужбата доаѓа во момент кога технолошките гиганти се натпреваруваат за водечка позиција во ерата на вештачката интелигенција.
OpenAI во последните месеци интензивно вработува инженери и раководители од Apple со цел да изгради посебен тим за развој на хардвер. Според податоците на CNN, најмалку десет инженери на Apple неодамна директно преминале во OpenAI.
Во исто време, Apple подготвува целосно нова верзија на гласовниот асистент Siri, која подоцна оваа година треба да добие напредни AI можности, вклучувајќи работа низ различни апликации и персонализирани одговори базирани на податоците од iPhone на корисникот.
Од друга страна, OpenAI и понатаму открива многу малку детали за својот хардверски проект. Според претходни медиумски извештаи, компанијата развива нова генерација AI уреди што ќе можат да ја препознаваат околината на корисникот, а некои извори наведуваат дека меѓу првите производи би можел да се најде и паметен звучник.
Доколку Apple успее да ги докаже своите тврдења пред суд, овој спор би можел да стане еден од најзначајните правни случаи во историјата на индустријата за вештачка интелигенција и да покаже колку борбата за доминација во AI ерата станала жестока – не само на пазарот, туку и во судниците.
Извор: web-mind.rs
