Студија од 2025 година покажала дека за опоравување од стрес и професионално согорување е потребно значително повеќе одмор отколку што просечниот вработен обично зема. Иако постојат многу причини зошто користењето платено отсуство понекогаш е тешко, од страв дека ќе заостанеме со работата до ограничен број слободни денови, преоптовареноста му штети на здравјето. Токму затоа е важно одморот и релаксацијата да станат приоритет.
Препорака: одмор на секои два месеци
Според истражувањето, вработените би требало да одат на одмор на секои два месеци. Иако за многумина ова може да звучи како недостижна цел, студијата покажала дека за позитивни ефекти не се неопходни долги и скапи патувања. Доволни се и пократки одмори или викенд-патувања, сè додека навистина овозможуваат време за исклучување од работните обврски.
„Нагласуваме дека редовните паузи помагаат во опоравувањето и го подобруваат чувството на општа благосостојба, со што се намалува стресот и се подобрува работниот учинок. Се залагаме почестите паузи да се вградат во работната култура преку практични стратегии за поединци и организации“, напишал авторот на студијата, Селвараџ Гиридхаран.
Одморот носи бројни здравствени придобивки
Постојаната работа без пауза со текот на времето го исцрпува телото. Во една студија, која опфатила 749 жени, истражувачите откриле дека жените кои оделе на одмор помалку од еднаш во шест години имале осум пати поголеми шанси да развијат проблеми со срцето во споредба со жените кои оделе на одмор двапати годишно.
Престојот во природа или на сонце може значително да го намали нивото на стрес на кој телото е изложено за време на работата, а носи и ментални и емоционални придобивки. Времето поминато далеку од работната маса или лаптопот дава можност за вистински одмор, на начин што често не е возможен во работната средина.
Луѓето се многу повеќе од работата што ја извршуваат и од секојдневниот стрес што го носат. Притоа, одморот не мора да биде луксузен. Тоа може да биде и одмор дома или кратко патување со автомобил. Сè додека свесно одвојувате време за себе, ќе ги почувствувате придобивките.
Извор: bizlife.rs
