Како бруцош на Универзитетот Пен Стејт, Езра Гершанок бил решен да најде работа во консалтинг по дипломирањето. Се приклучил на консалтинг клуб и поминал безброј часови подготвувајќи се за интервјуа.
Ја завршил последната година од студиите со три понуди за работа со полно работно време, вклучувајќи една во Deloitte во секторот за владини и јавни услуги на фирмата, и една, која ја прифатил, во McKinsey & Company.
„Нема многу подобри места каде што можеш да работиш на различни работи, да патуваш, да работиш со млади луѓе, и има многу бенефиции“, изјавил тој за Business Insider. Како студент, перспективата да лета во бизнис класа, да престојува во Ritz Carlton и, секако, да учи од познати извршни директори во својата прва работа, изгледала примамливо.
Сепак, Гершанок брзо сфатил дека неговата улога не е онаа што ја очекувал.
„Мојот прв проект беше работа за провајдер на комунални услуги, и буквално не правевме ништо“, изјавил тој.
Во рок од две години ја напуштил фирмата и го основал својот сопствен стартап, Ohana, платформа за услуги за наем.
Додека консалтингот некогаш бил сонот за многумина, Gen Z почнува да го гледа само како финансиски атрактивен чекор кон нешто друго. Четворица консултанти од Gen Z изјавиле за Business Insider дека не планираат да останат во индустријата на долг рок. Тоа е стабилна работа и блескав доказ на нивните резимеа што им отвора врати да ги следат своите соништа.
Недостигот на рамнотежа помеѓу работата и приватниот живот
Вики Салеми, експерт за кариера во Monster, за Business Insider вели дека причината за ова ја гледа во фактот што консалтингот може да биде многу стресен — со работни недели од 60 до 80 часа — младите се прашуваат дали е тоа вистинскиот пат за нив, барем на долг рок.
„Се случи промена во начинот на размислување за оваа позиција, размислувајќи, ‘што потпишав?’“ вели таа и додава, „Кога ќе стигнете на тоа ниво, нема баланс. Обично сè е работа.“
Салеми, која претходно регрутирала за големи консалтинг фирми и фирми од Големата четворка, вели дека многу млади луѓе кои ги почнуваат своите кариери преминуваат од прашања за бенефиции кон фокусирање на области како канцелариска култура.
Но, таа не очекува консалтинг индустријата да остане без работници поради можностите што ги носи искуството. Освен што прават контакти со клиентските компании, младите рано во нивните кариери можат да учат од своите поискусни колеги, како и преку програми за обука во компаниите.
„Тие можат да почувствуваат дека можат да дадат многу во однос на својот придонес на работа, но исто така да добијат многу од внатрешните организациски структури и огромното знаење што нивните ментори и шефови можат да го донесат на маса,“ вели Салеми.
Таа смета дека можностите за учење можат да им помогнат на младите консултанти да се справат со долгите часови и стресот на работата.
„Некои работни места сè уште се под голем притисок, и тоа нема да се промени,“ вели Салеми.
Консултантите од Gen Z велат дека работните часови се вредни додека учат нови вештини. Но, по неколку години на работа, кривата на учење се израмнува, а нивната работа може да ја изгуби својата значајност.
Хорхе Гарсија Феблес, сениор консултант во Deloitte, за Business Insider вели: „Мислам дека многу луѓе само пловат низ оваа работа, но тоа не е она што го барам. Сакам да чувствувам дека всушност правам нешто значајно.“
Добра стартна платформа, но страста ja нема
Калудс Јо, консултант за стратегија и менаџмент од Gen Z во водечка глобална фирма, вели:
„Бидејќи постојано работите во различни индустрии, има толку многу одлични врати во смисла на можности за излез, не се ограничувате на една индустрија.“
Има и престиж во добивањето работа во водечка консалтинг фирма — нешто што не останува незабележано или неценето од страна на генерацијата која е фокусирана на социјалните медиуми.
Еден консултант од Gen Z во PwC кој остана анонимен, смета дека работата е идеална за дипломирани студенти кои не знаат што сакаат да прават, бидејќи тоа е добар начин да се стекнат многу општи вештини. Тој смета дека некои долгогодишни консултанти со кои работи, едноставно се навикнале на своите работни места и се откажале од своите други амбиции и страсти. За да го избегне тоа, планира да го напушти консалтингот и да се занимава со работа за која чувствува дека е повлијателна и во индустрија која му е важна.
Некои млади консултанти велат дека во еден момент мора да се одлучат помеѓу останување на работа која нуди престиж и одредена сигурност и наоѓање на цел во нивните кариери.
