Таа е нежна алтернатива на посилните ексфолијанти, совршен баланс меѓу ефикасност и паметна нега. Оваа AHA киселина делува на површината на кожата, нежно ги отстранува мртвите клетки, а истовремено хидрира како крема. Резултатот е мазна, изедначена и „жива“ кожа, без чувство на затегнатост и сувост.
Што е млечна киселина?
Млечната киселина е алфа-хидрокси киселина (AHA) и една од најомилените хемиски ексфолијанти во негата на кожа. Се добива со ферментација на природни шеќери, најчесто од овошни или растителни состојки. За разлика од посилните AHA киселини како гликолната, молекулата на млечната киселина е поголема, што значи дека делува побавно, но значително понежно. Нејзината улога е едноставна, но клучна: ги отстранува мртвите клетки што го прават тенот безживотен и нерамномерен, поттикнувајќи поздраво обновување на кожата.
Како делува млечната киселина на кожата
Замислете дека подигнувате тенок превез од лицето, токму тоа го прави млечната киселина. Таа ги раствора врските што ги држат мртвите клетки на површинскиот слој на кожата, овозможувајќи полесно да се отстранат и да се открие посвеж, помазен и посјаен тен. Но, тоа не е сè.
- Освен ексфолијација, ја стимулира продукцијата на колаген и гликозаминогликани (GAG), молекули што ја прават кожата поцврста и поеластична.
- Со редовна употреба помага во намалување на фините линии и темните дамки, враќајќи му на тенот младешки изглед.
- Не дава моментален „wow“ ефект преку ноќ, но прави видлива разлика со текот на времето.
Сојузник на заштитната бариера на кожата
Една од најголемите предности на млечната киселина е нејзината способност да ја зајакне заштитната бариера на кожата. За разлика од поагресивните ексфолијанти што ја „соблекуваат“ заштитата, млечната киселина не ја оштетува, туку ѝ помага на кожата да изгради посилни одбранбени механизми.
Таа ја поттикнува продукцијата на церамиди – липиди што делуваат како „лепак“ меѓу клетките, го намалуваат губењето на влага и чувството на иритација. Кожата станува поотпорна, подобро хидрирана, поеластична и природно сјајна, дури и без шминка.
Кога и како да ја користите млечната киселина
Најдобро време за користење млечна киселина е навечер. За време на сонот, кожата е најприемчива и активна во процесот на обновување, па третманот има подобар ефект.
- Започнете со серум или тоник со млечна киселина 2–3 пати неделно.
- Ако кожата добро ја поднесува, постепено зголемувајте ја зачестеноста.
- Златно правило: никогаш не прескокнувајте заштита од сонце – AHA киселините ја зголемуваат чувствителноста на кожата на UV зраци, па SPF преку ден е задолжителен.
- По нанесување на млечната киселина, продолжете со богати хидратантни креми или серуми со хијалуронска киселина или церамиди, за да го засилите сјајот и да ја задржите кожата мека и еластична.
Клучни придобивки од млечната киселина во негата на кожа
Убавината на млечната киселина е во тоа што не го менува само изгледот на кожата – туку и начинот на кој таа се чувствува на допир. Еве ги главните бенефити:
- Нежна, постепена ексфолијација на површинскиот слој
- Длабинска хидратација благодарение на способноста да задржува влага
- Инстантен сјај и изедначен тен
- Намалување на темни дамки и фини линии
- Зајакната заштитна бариера со повеќе природни церамиди
- Видлив anti-age ефект со текот на времето
- Помазна и порамномерна текстура на кожата
Како да ја комбинирате (и што да избегнувате)
Иако млечната киселина е понежна од другите AHA, сепак е киселина и треба да се користи внимателно.
Избегнувајте да ја користите истовремено со:
- витамин C
- ретинол
- салицилна киселина
- други AHA/BHA киселини
Комбинацијата може да доведе до преоптоварување на кожата или нарушување на pH рамнотежата.
Најдобра стратегија е наизменично користење: една вечер ексфолијација со млечна киселина, следната вечер фокус на хидратација или anti-age нега.
Мултифункционална состојка што лесно се вклопува во рутината
Млечната киселина природно се вклопува во секоја рутина за нега – ќе ја најдете во:
- серуми
- ексфолијативни тоници
- нежни гелови за чистење
- креми за тело (за омекнување на колена, лакти и груби делови)
На лицето го засилува сјајот, на телото ја изедначува текстурата, а на рацете омекнува и негува. Тоа е состојка што ја прави кожата поубава – каде и да ја користите.
Извор: easylife.rs
