Од една страна, го имаме New Age „просветлувањето“, кое целосно се претвори во грижа за себе, љубов кон себе и работа на себе. Од друга, потрагата по „најдобрата верзија од себе“ се сведува на прекројување на телото, со мотиви спротивни на каква било вистинска свесност.
Чувствувајќи ја оваа вознемирувачка тензија посилно од многумина, Kate Winslet го крена гласот, отворено критикувајќи ја опсесијата со слабеењето и изгледот во ново интервју за Sunday Times. Таа ги прозва и популарните третмани како филери и ботокс, нарекувајќи ги разорна манифестација на несигурност во сопствениот изглед. Изразувајќи длабока загриженост за хаосот што го гледа околу себе, Кејт изјави дека „некои го прават тоа за да бидат свои, а други прават сè за да не бидат свои“. Особено истакна: „Дали воопшто знаат што внесуваат во своите тела? Презирот кон сопственото здравје е застрашувачки.“
Kate Winslet vs. холивудската опсесија со слабеењето
Глас на разумот во хаосот
Winslet потсети дека и самата доживеала body-shaming (кој не е „резервиран“ само за познатите) и била брутално исмејувана од таблоидите по успехот на филмот Titanic, кога имала само 22 години. Опсесијата со слабеењето ја довела до развој на нарушување во исхраната, со кое во еден период се борела. Денес, Кејт е глас на разумот што се издигнува над неартикулираната бучава затоа што ја научила најтешката лекција: поставување граници. И повеќе не му дозволува на никого да го коментира нејзиното тело. Дури ни да ја „фали“ за наводно изгубени килограми.
За разлика од многумина, таа одбива да ги прифати наметнатите холивудски идеали, нагласувајќи дека стареењето и промените на телото со текот на времето не се мана, туку дел од животот. Таа рече дека некои од најубавите жени што ги познава имаат над 70 години и дека младите жени немаат поим што навистина значи убавина. „Луѓето станаа опседнати со бркање на идејата за совршенство, само за да добијат повеќе лајкови на Instagram. Тоа многу ме вознемирува“, изјави таа.
Со овие едноставни зборови, Кејт го изрази немирот што го чувствува секоја жена која се обидува да најде и задржи рамнотежа во свет што испраќа спротивставени пораки:
- Биди автентична – биди совршена
- Изрази се – исполни ги очекувањата
- Не се споредувај со другите – биди подобра од другите
- Сакај се себеси – поправај се себеси
- Прифати го своето тело – втисни го во калап бр. 32
Во таа смисла, нејзиниот став делува како потсетник дека опсесијата со слабеењето, здружена со „лесни“ решенија, не доаѓа без лична, физичка и психичка цена.
Опсесијата со слабеењето крунисана со Ozempic
Ozempic, лек првично наменет за дијабетичари, последниве години во Холивуд стана магично решение за слабеење. Ретко кој прашува колку чини, не во пари, туку во здравје кога ќе се појави шанса да се достигне идеалот на екстремна слабост.
Но, некои пробаа и се откажаа.
Amy Schumer отворено изјави дека изгубила повеќе од 13 килограми користејќи Ozempic, но се откажала затоа што се чувствувала ужасно, лежела во кревет со мачнини и без енергија. „Не можев да ја кренам главата од перницата“, рече таа. За неа, цената била превисока.
Sharon Osbourne призна дека ослабела околу 19 килограми благодарение на Ozempic, но подоцна изјави дека е „премногу слаба“ и дека не сака да продолжи.
Од друга страна, многумина јавно го бранат правото на избор, наведувајќи дека Ozempic, кога се користи одговорно, може да помогне на луѓе што се борат со дебелина или сериозни здравствени проблеми.
Бенефити vs. злоупотреба
Историјата на човештвото нè учи дека сè што е создадено со благородна цел може да се злоупотреби. А ако злоупотребата е можна таа сигурно ќе се случи.
Во едниот агол се „добрите момци“:
- реална потреба
- здравствени причини
- слобода на избор
Луѓето кои страдале од вишок килограми, метаболички проблеми или дијабетес сметаат дека ваквите терапии носат сериозни подобрувања на здравјето и квалитетот на животот. За некои, тоа бил последниот чекор кога диетата и вежбањето не биле доволни – и тоа заслужува почит.
Во другиот агол се „лошите момци“:
- инстант култура
- естетски притисоци
- несакани ефекти
Брзото слабеење, без соодветен медицински надзор, може да предизвика сериозни последици како што сведочи и искуството на Amy Schumer. Дополнително, постои ризик лекови за дијабетес да се третираат како козметичко средство, што може да ја намали нивната достапност за оние на кои навистина им се потребни.
А кога фокусот се стеснува исклучиво на слабеењето, се занемаруваат подлабоките теми:
- здравје
- чувство на стабилност
- прифаќање на себе
Токму на тоа предупредува Kate Winslet.
Опсесијата со слабеењето е гласна – бидете гласни и вие
Светот го гледа она што му се сервира: слаби, остри, бескомпромисно полирани холивудски ѕвезди. Колективниот ефект од тие трансформации е поразителен. Опсесијата со слабеењето ја прегази кампањата за прифаќање на телото и природната убавина, која за краток момент успеа да воспостави рамнотежа меѓу љубовта кон себе и постојаното „поправање“ на себе.
А што да прават оние што не можат или не сакаат да се приклучат на тој галоп? Истото што отсекогаш го правеле. Автентичноста секогаш била индивидуално прашање и никогаш дел од бучна колективна свест.
Кој знае да биде свој, тивко ќе се наметне со силата на својот интегритет – без разлика дали има 50 или 100 килограми. Галопирачките трендови нема да го прегазат, туку ќе го заобиколат. Kate Winslet не е единствениот глас на здравиот разум што им се спротивставува на вознемирувачките трендови.
Извор: easylife.rs
