Семејство фармери од Кентаки даде инспиративна причина зошто не сака да ја продаде својата земја по повеќекратно зголемена цена понудена од технолошки гиганти, заинтересирани нивните 22 хектари пасишта да ги претворат во голем дата центар.
Семејството на 82-годишната Ида Хадлстон одби неверојатни 26 милиони долари за вкупно 534 хектари земја во северен Кентаки, откако неименувана технолошка компанија од листата Fortune 100 понуди дури десет пати поголема вредност од реалната.
Хадлстон и нејзината ќерка Делсија Бејр, која е мнозински сопственик на земјата, се придружија на сè поголемиот број фармери кои одбиваат огромни суми пари за да ја зачуваат својата плодна земја од претворање во дата центри, клучни за развојот на вештачката интелигенција. Нивното семејство ја обработува оваа земја со генерации, и покрај бројните кризи низ претходниот век, а Бејр истакнува дека некои нешта едноставно немаат цена.
„Ако ме прашувате мене, ќе останам овде, ќе ја задржам оваа земја и ќе продолжам да ги хранам луѓето. Тие 26 милиони за мене не значат ништо“, рече таа. Ова семејство не е единственото во таа област кое добило огромни понуди; додека некои фармери прифатиле профитабилни договори, други, и покрај упорноста на компаниите, одлучиле да останат на своето.
Според зборовите на Бејр, парите не можат да ја надоместат врската што нивното семејство ја има со земјата. „Додека сум на оваа земја, додека таа ме храни и се грижи за мене, ништо не може да ме уништи“, вели таа. Сопственичката објаснува дека нејзините корени се длабоко вкоренети во таа земја: „Мојот дедо, прадедо и многу членови на семејството живееле овде со години, плаќале даноци и ги хранеле луѓето од оваа земја,“ пренесува Unilad.
Таа поврзаност не е само лична, туку и историска. Нејзиното семејство, како што вели, играло улога и во клучните моменти на американската историја. „Дури и за време на Големата депресија одгледувавме пченица и помагавме да се обезбеди леб кога луѓето немаа ништо.“
И додека технолошките компании продолжуваат со обидите да го купат земјиштето во таа област, дури планирајќи и дополнителни енергетски капацитети за идните центри, Ида Хадлстон останува цврста во својот став.
„Нè нарекуваат стари, глупави фармери, но не сме“, рече таа. „Знаеме што се случува кога ќе ја снема храната, кога ќе ја снема земјата и водата… веќе сме го виделе тоа.“
На прашањето дали дата центарот би донел нови работни места и би ја подобрил локалната економија, Хадлстон немаше дилема: целата идеја ја нарече „измама“ и додаде: „Велам дека лажат и дека во тоа нема вистина.“ Сепак, дури и ако ова семејство остане при својата одлука, постои можност дата центарот да се изгради во близина, доколку други фармери ја продадат својата земја.
За Делсија Бејр, одлуката е лична и длабока, речиси симболична. Споредувајќи се себеси со Скарлет О’Хара, порача:
„Како што таа беше врзана за својата земја, така сум и јас. Додека сум овде, додека оваа земја ме храни и чува, ништо не може да ме скрши.“
Извор: odrzime.rs
