Авторката на книгата „Managing Up: How to Get What You Need From the People in Charge“, професорка по човечко однесување и коуч на лидери од компании како Google и Amazon, открива дека постои начин да се справиш со микроменаџер – без секојдневно да ја губиш енергијата и нервите, пишува CNBC Make It.
Пет едноставни чекори за справување со претерано контролирачки шеф
1. Не чекај совршенство – покажи ја првата верзија
Наместо со денови да го дотеруваш проектот до совршенство, направи основна верзија и кажи:
„Ова е она што досега го подготвив. Не е финално, но сакав да го покажам концептот и структурата за да го развиеме понатаму заедно.“
Така покажуваш иницијатива, му даваш простор на шефот да даде мислење, а себеси си штедиш време и нерви.
2. Потврди го неговиот авторитет (но задржи го своето мислење)
Користи фрази како:
„Секако, конечната одлука е ваша,“
„Еве го мојот предлог, вие одлучете што е најдобро.“
Ова не значи дека се повлекуваш, туку дека покажуваш зрелост и разбирање на хиерархијата. Наместо директни предлози, поставувај прашања:
„Што мислите ако пробаме со…?“ или „Би имало ли смисла да направиме…?“
Со ова му даваш чувство на контрола, а ја намалуваш тензијата.
3. Сподели информации пред да ги побара
Испрати краток неделен план или извести ако доцниш на состанок. Иако изгледа напорно, ова го задоволува неговиот апетит за контрола – а тебе те ослободува од дополнителни објаснувања подоцна.
На пример:
„За да ве држам во тек – го подготвив неделниот извештај со главните новини.“
„Потврдувам дека продолжуваме со [проект X]. Известете ме до петок ако има промени.“
4. Претекни ја критиката
Кажи:
„Планирам да ја направам [задачата X] на овој начин. Дали имате совет пред да почнам?“
Ако дојде до забелешка, користи ја техниката „да, и…“ – прифати ја нивната поента, но додади и своја перспектива:
„Да, разбирам дека треба да бидам пократок во мејловите, и мислам дека сепак вреди да се задржи дел од контекстот, поради оние што не се целосно запознаени со проектот.“
Така покажуваш дека слушаш – но и дека размислуваш.
5. Барај и пофалба, не само критика
Кажи:
„Сакам да знам на што треба да работам, но ми е важно и да знам што правам добро – за да го правам тоа почесто.“
„Би можеле ли понекогаш да споделите што ви се допаѓа во мојот пристап, или преферирате да се фокусираме само на подобрувањата?“
Со тоа покажуваш дека ти е важно да растеш – но и дека вреднуваш признавање.
Типовите со потреба за целосна контрола ретко го менуваат својот стил, но со малку психолошка тактика можеш да ја свртиш ситуацијата во своја корист. Клучот е да му дадеш чувство дека управува со сè, додека ти тивко го преземаш водството над сопствената работа – и над сопствениот мир.
