Резултатите се базираат на интерно истражување, како и на наодите од анкетата спроведена на 1.000 хибридни канцелариски работници ширум светот.
Хибридното и работењето на далечина, кое стана популарно за време на пандемијата на Ковид-19, бидејќи компаниите ширум светот привремено ги затворија канцелариите за да ги исполнат здравствените стандарди, стана постојан начин на работа за многу компании.
Бројот на луѓе кои работат од дома се зголеми за пет пати помеѓу 2019 и 2023 година, а 40 проценти од вработените во САД моментално работат на далечина барем еден ден во неделата, се вели во извештајот објавен од Институтот за истражување на економска политика на Стенфорд.
„Благодарение на клауд технологијата која овозможува работа од кое било место во светот, под услов да е достапна висококвалитетна интернет конекција, сè повеќе поединци ја прифаќаат идејата за комбинирање на работата и патувањето, без разлика дали се работи за неколку дена или неколку месеци од животот на дигиталниот номад“, рече Марк Диксон, основач и извршен директор на International Workplace Group.
Според извештајот на IWG, 84 проценти од хибридните работници или го продолжиле или би размислувале да го продолжат времето за одмор за да работат на далечина, додека пак 75 проценти рекле дека „слободата да работат од каде било го зголемува нивното задоволство од работата“.
Извор: Pexels
Во извештајот на IWG е направена споредба на 30 градови низ светот кои се оценети на скала од 1 до 10 во следниве категории:
- Клима
- Култура
- Сместување
- Превоз
- Храна
- Трошоци за живот
- Среќа
- Одржливост
- Достапност на флексибилен работен простор
Овој критериум е избран за да „помогне да се процени колку ќе биде погодна околината во странство, особено кога ќе се земат предвид работните обврски“, изјави Диксон за CNBC Make It.
„Покрај основните услови за живот (сместување, превоз, храна итн.), постојат клучни фактори кои можат да имаат значително влијание врз продуктивноста на работниците, како што се пристапот до интернет и достапноста на флексибилен работен простор“, додаде тој.
Будимпешта е на врвот на овогодинешната листа со високи оценки во категориите сместување (9,5/10), превоз (9,5/10), одржливост (8,5/10) и брзина на интернет (8/10).
Извор: Pixabay
Главниот град на Унгарија е „познат по својата класична архитектура, која привлекува околу 12 милиони меѓународни туристи годишно и има повеќе од 200 музеи и галерии, живописни населби и изобилство од зелени површини, што го прави идеален избор за дигиталните номади“, пишува во извештајот.
10-те најдобри градови за хибридна работа, според IWG:
- Будимпешта
- Барселона
- Рио де Жанеиро
- Пекинг
- Лисабон
- Њујорк
- Сингапур
- Џакарта
- Лос Анџелес
- Милано
Барселона, која минатата година беше на врвот на листата, и понатаму е фаворит на хибридните работници. Освен дигиталната номадска виза, безбедната сообраќајна инфраструктура и релативно прифатливите трошоци за живот, шпанскиот град нуди и „енергична атмосфера, прекрасна архитектура и сонце речиси во текот на целата година“, се вели во извештајот.
Барселона постигна високи оценки во категориите превоз (9/10), клима (8,5/10) и сместување (8,5/10), кои ја мерат цената на месечниот билет за превоз, вкупниот број на сончеви часови на годишно ниво и просечната месечна кирија.
Градовите во Азија, исто така, се истакнаа на овогодинешната листа, а Пекинг, Сингапур и Џакарта се најдоа во првите 10. Пекинг оваа година падна на четврто место.
Во меѓувреме, Сингапур се искачи за импресивни 14 места од минатата година и сега е на седмото место. Градот-држава постигна исклучително добри резултати во категориите квалитет на интернет конекција (10/10) и одржливост (9/10).
Сингапур, кој може да се пофали со вториот најдобар аеродром во светот, служи како „глобална порта кон југоисточна Азија“, што го прави атрактивна дестинација за патниците. Сингапур, исто така, втора година по ред е прогласен за најсреќна земја во Азија и е на добар пат да понуди покриеност со 5G мрежа на целиот остров до 2025 година, пишува во извештајот на IWG.
