Според истражувањата на психотерапевтите, додека сме на работа мозокот постојано носи одлуки, брзо реагира и троши многу енергија. Затоа, кога работниот ден ќе заврши, важно е да воспоставиме ритуал кој ќе му сигнализира на мозокот дека е време за промена на режимот. Ви откриваме кои ритуали може да помогнат да го „исклучите“ мозокот од работа и навистина да влезете во својот простор на одмор, мир и живот надвор од канцеларија.
Ритуали по работа кои психолозите ги препорачуваат за ментално „исклучување“
Усвојте рутина за затворање на работниот ден
Кога завршува работното време, дали имате мал ритуал што го означува крајот на денот? Тоа може да биде затворање на лаптопот, расчистување на табовите или дури и симболично „ставaње на лаптопот на спиење“.
Таквиот гест му помага на мозокот да „сфати“ дека следува друга состојба.
Ако работите од дома, можете дополнително да ја означите оваа рутина – изнесете ја работната опрема од дневната соба или сменете го местото каде што работевте. Така создавате физичка и ментална дистанца.
Туш или брзо пресоблекување како сигнал
По напорен ден, телото и понатаму е „вклучено“.
Топол туш, облекување удобна облека или кратка прошетка му сигнализираат на телото: „Работата заврши, започнува одмор.“
Не мора да биде долг ритуал – важно е да биде доследен и препознатлив секој ден.
Ритуали за ментален одмор
Направете „листa на завршени работи“ и затворете го денот
Пред да преминете на приватни обврски, запишете што сте завршиле тој ден.
Ова не е листа на задачи која се продолжува – туку потврда дека она што требало да се направи, е направено.
Може да запишете и што следува како следен чекор – но со јасна свест дека тоа е за утре.
На овој начин не го носите „проектот во глава“ дома и го избегнувате чувството „треба уште ова… уште она…“
Направете физички „прекинувач“
Промена на активност или позиција – пресоблекување, кратка прошетка, расчистување на работната маса – може да делува како сигнал до нервниот систем.
Дури и нешто едноставно, како пат од работниот простор до домот без да размислувате за работа, може да биде клучен прекин на режимот.
Поставете и почитувајте временски граници
Одредете време кога формално завршувате со работа и придржувајте се до тоа – без одговарање на мејлови и „итни“ барања по тој термин, освен ако не е навистина неопходно.
Јасните граници му помагаат на умот, но и на телото да излезе од состојба на висока будност.
Кога и другите знаат дека по одредено време не сте достапни, тоа ви овозможува навистина да се одморите – физички и ментално.
Одморот не е луксуз – туку неопходност
Овој процес не е само престанок со работа – тоа е создавање услови умот да се одмори, регенерира и подготви за нови предизвици утре.
Со воведување мали, но доследни ритуали, си покажувате дека одморот не е награда – туку услов за добро ментално здравје и долгорочна продуктивност.
