Тинејџерските профили стануваат приватни на Instagram и Facebook
Од јули 2025 година, сите нови профили на тинејџери на Instagram и Facebook автоматски ќе бидат поставени како приватни, а комуникацијата ќе биде дозволена само со веќе постоечки контакти. Со оваа мерка, Meta воведува една од најсеопфатните безбедносни бариери досега, со цел да го спречи контактот со непознати лица кои би можеле да претставуваат потенцијална закана.
Она што дополнително ја зајакнува оваа иницијатива е системот за предупредување во пораки: кога тинејџер ќе добие директна порака од лице што не го следи, алгоритмот прикажува информации за тоа кога е креиран профилот, советува претпазливост и нуди брзи опции за блокирање или пријавување. Во пракса, ова веќе дава резултати, само во јуни, корисници под 18 години над еден милион пати ги искористиле овие алатки за заштита.
Meta отстрани над половина милион профили поради сексуализација на деца
Паралелно со воведувањето на новите функции, компанијата објави податок кој ги шокираше и стручњаците и јавноста: над 635.000 профили биле отстранети поради содржини што сексуализираат малолетници. Од нив, 135.000 профили биле идентификувани преку автоматизирана анализа на коментари, додека останатите биле откриени преку мрежи од поврзани корисници.
Покрај тоа, Meta тестира вештачка интелигенција што препознава лажно пријавена возраст. Доколку системот открие дека корисникот е постар или помлад од пријавеното, профилот автоматски се префрлува во заштитен режим за малолетни корисници, без оглед на наведените информации. Целта е да се елиминира можноста возрасни лица да креираат профили што изгледаат како тинејџери, пракса позната како „catfishing“, објави TechRadar.
Извор: web-mind.rs
