Овој феномен се појавува под притисокот на современиот деловен свет, каде што пораката дека „никој не е незаменлив“ звучи сè погласно. Во таква атмосфера, многумина почнуваат да веруваат дека мора постојано да се докажуваат, да изгледаат суперкомпетентно, брзо и ефикасно, дури и кога внатрешно се чувствуваат несигурно или преоптоварено.
Па така, насмевката станува маска, самоуверениот настап станува одбрана, а глумењето сигурност станува дел од секојдневието. Но експертите за кариера предупредуваат: перформативната самодоверба не е добра стратегија, туку стапица што може да води кон burnout, исцрпеност и губење на довербата.
Затоа е важно да го препознаете ова однесување навреме. Можно е и несвесно да го практикувате, а токму тоа може постепено да ви ја наруши кариерата, односите на работа и чувството на лична стабилност.
Што е перформативна самодоверба
Перформативната самодоверба е кога на работа се прикажувате посигурно отколку што навистина се чувствувате, најчесто за да ја прикриете несигурноста или стравот од грешка. Наместо да поставите прашање или да признаете дека нешто е предизвик, настапувате како сè да е под контрола.
На прв поглед, тоа може да изгледа професионално. Брз говор, одлучен став, сигурен настап, без простор за сомнеж. Но, зад таа „сцена“ често се кријат притисок, исцрпеност и страв дека не смееме да покажеме слабост.
Проблемот е што ова оди чекор подалеку од познатото „fake it till you make it“. Кога постојано ја криете несигурноста, создавате нереални очекувања, ја намалувате искреноста на работното место и на крај може самите да се доведете до burnout.
Зошто перформативната самодоверба е во подем
Економската несигурност, отпуштањата и сè поголемата употреба на AI создаваат дополнителен притисок кај вработените. Во таква атмосфера, многумина чувствуваат дека мора постојано да се докажуваат, да изгледаат сигурно и да ја „осигураат“ својата позиција.
Проблемот станува уште поголем кога работната култура повеќе ја наградува самодовербата отколку љубопитноста. Наместо да поставуваат прашања, да бараат совет или отворено да дискутираат, вработените почнуваат да глумат дека сè знаат и сами да се борат со проблемите.
Извор: Freepik
Како перформативната самодоверба ја нарушува вашата кариера
Постојаното прикажување самоувереност може да изгледа како паметен потег, но брзо станува исцрпувачко. Наместо да учите, да градите вештини и да барате поддршка, трошите енергија на играње улога.
Со текот на времето, лажната сигурност ја поткопува вистинската. Почнувате да се сомневате во себе, избегнувате помош и го зголемувате ризикот од грешки.
А кога резултатите нема да го следат самоуверениот настап, професионалниот углед може да настрада. Затоа неавтентичната сигурност не е одржлива стратегија, туку директен пат кон исцрпеност и burnout.
Како да ја избегнете перформативната самодоверба
Градете реална компетентност
Сосема е во ред да не знаете сè. Токму тоа остава простор за учење. Поставувајте добри прашања, признајте кога нешто не ви е јасно и гледајте на учењето како на сила, не како на слабост.
Побарајте совет од ментор
Пронајдете ментор кој покажува вистинска самодоверба, а не глума. Побарајте совет кога да поставите прашање, како да побарате помош и како подобро да се носите со предизвиците на работа. Самодовербата што се гради врз искуство и резултати е единствената што навистина трае.
Проверувајте се себеси
Обрнете внимание кога влегувате во „режим на перформанс“: претерано објаснувате, ветувате премногу или молчите кога треба да зборувате. Колку сте посвесни за тоа, толку полесно ќе препознаете кога глумите сигурност. На работа најмногу доверба градат луѓето чии зборови и дела се совпаѓаат.
Дали сте подготвени да ја замените „глумата“ со вистинско знаење?
Извор: easylife.rs
