Лажните огласи за работа се множат на интернет, а се повеќе компании признаваат дека објавуваат нови работни места кои изгледаат реално, но всушност не постојат.
Четириесет проценти од компаниите рекле дека оваа година објавиле лажни списоци за работни места, се вели во истражување спроведено во мај меѓу 650 менаџери за вработување од сајтот Resume Builder. Според истражувањето, три од 10 компании моментално имаат лажни огласи на нивните веб-страници или на огласни сајтови.
За разлика од измами во кои криминалците настојуваат да добијат лични податоци на кандидатите, во овој случај самите менаџери за вработување стојат зад овие „ работни места – духови“.
Додека седум од 10 менаџери за вработување веруваат дека оваа пракса е етичка, прифатлива и корисна за бизнисот, таа го комплицира барањето на работа за работниците, а исто така може да ја наруши нивната доверба во компаниите.
„Ова не е нешто ново, но е подигнато на сосема ново ниво од она што го гледаме“, рече главниот советник за кариера во Resume Builder, Стејси Халер. „Тоа е многу загрижувачко, и тие го прават тоа за да создадат одреден впечаток во светот и кај своите вработени. Но зборот ‘лажно’ не треба да се применува никаде во процесот на вработување.“
Менаџерите за вработување изјавиле за Resume Builder дека одделенијата за човечки ресурси на нивните компании, повисоките менаџери и раководители, и во неколку случаи, инвеститори или консултанти, смислиле лажни шеми за работни места.
Од компаниите што се занимавале со оваа пракса, 45% објавиле меѓу еден до пет лажни огласи за работа; 19% објавиле 10; 11% објавиле 50; 10% објавиле 25; а 13% објавиле 75 или повеќе. Улогите ги опфаќале сите нивоа, од почетни позиции до извршни работни места.
„Подобро да работиш повеќе“
Извор: Freepik / christopherdisho786
Според истражувањето, компаниите имаат неколку мотиви за објавување измамнички огласи. Прво, некои имаат за цел да ги наведат сегашните вработени да помислат дека компанијата не само што расте, туку и се труди да вработи повеќе работници за да го олесни постојното оптоварување.
Во некои случаи, менаџерите за вработување изјавиле дека нивната цел е да сигнализираат на сегашните вработени дека се заменливи.
Речиси 60 проценти од анкетираните компании изјавиле дека собираат биографии за да ги задржат за подоцнежен датум, без намера веднаш да вработат некого, пишува CBS News.
„Тие тоа можат да го направат за да сугерираат дека вработуваат, така што ако сте веќе нивен работник, ќе помислите: ‘Ќе ве ослободиме од работа’“, изјави Халер. „Тоа исто така може да биде начин да се каже: ‘Ние сме компанија што расте’. Исто така, тоа би можело да биде начин да се каже: ‘Бараме работници да ве замениме, па подобро да работите повеќе’.“
Што се однесува до менаџерите за вработување, повеќето велат дека морално сомнителната тактика функционира. Скоро 70 проценти од нив рекле дека објавувањето лажни огласи за работа го зголемило приходот. Шеесет и пет проценти рекле дека огласите за работа имаат позитивно влијание врз моралот, а 77 проценти изјавиле дека продуктивноста меѓу работниците е зголемена.
Зголемувањето на ваквите објави може да објасни зошто толку многу луѓе кои бараат работа велат дека никогаш не добиле одговор од регрутите откако ги испратиле своите биографии. Сепак, некои компании вложуваат големи напори да ја продолжат измамата, дури и одат толку далеку што интервјуираат кандидати за лажни работни места.
Скоро 40 проценти од компаниите рекле дека секогаш ги контактирале кандидатите кои аплицирале за лажни позиции. Од тие компании 85 проценти рекле дека интервјуирале кандидати.
Четириесет и пет проценти од компаниите велат дека понекогаш контактирале кандидати, а 17 проценти ретко или никогаш.
Регрутите во голема мера ја прифаќаат оваа практика. Седум од 10 рекле дека веруваат дека е морално прифатлива, и покрај тоа што ги доведува во заблуда и оние кои бараат работа и постоечките вработени. Но, може да биде тешко да се задржи овој трик во тајност, особено внатрешно. Две третини од регрутите велат дека вработените, инвеститорите или кандидатите дознале за лажните огласи.
„Тоа дефинитивно ќе му наштети на вашиот углед, бидејќи не знам никој кој сака да работи за компанија што го лаже“, рече Халер.
Можете ли да препознаете лажен оглас за работа?
Може да биде тешко да се направи разлика помеѓу вистински и лажни огласи, особено кога компанијата решава да продолжи со заблуда интервјуирајќи кандидати. Дури и ако менаџерот за вработување го зачува вашето CV за подоцнежна референца, објавата се смета за лажна ако компанијата нема намера веднаш да ја пополни таа позиција.
Поради ова, огласите за работа кои биле активни подолго време, можеби се лажни, вели Халер. Ако распонот на плата за некоја позиција е премногу широк, тоа исто така може да укажува на тоа дека компанијата не е сериозна во поглед на пополнување на таа позиција.
