„Имам две работи со полно работно време“, изјави за локалната телевизија KARE 11 американскиот карлинг-играч Кореј Дропкин. „Едната е карлинг… а другата е работа со недвижности.“ Неговата партнерка во микс-дубл, Кори Тисе, работи во компанија која се занимава со третман на отпадни води и благодарение на таа стабилна плата може да ги финансира натпреварувањата.
Таквата ситуација не е исклучок, туку правило. Меѓународниот олимписки комитет не ги исплаќа директно спортистите за настапите ниту за медалите. Околу 90% од приходите, приближно 4,2 милиони долари дневно, ги прераспределува на националните олимписки комитети и меѓународните сојузи, а тие потоа одлучуваат како ќе ги поддржат спортистите во своите земји.
Во САД тоа вклучува и парични награди за медали – 37.500 долари за злато, 22.500 за сребро и 15.000 за бронза, но тие пари ги добиваат само оние кои ќе се искачат на победничкиот подиум. Во спортови како карлинг, биатлон или скелетон, каде што спонзорствата и ТВ-правата се ограничени, тоа најчесто не е доволно за долгорочна кариера.
Уметничката пливачка Анита Алварез раскажа дека стипендијата од 250 долари месечно ја дополнувала со работа во продавница за спортска опрема. И кога стипендијата пораснала на 1.900 долари, признала дека било исклучително стресно да се усогласат исцрпувачките тренинзи со смените на работа.
Моделите на финансирање се разликуваат од земја до земја. Во Италија, домаќинот на Зимските олимписки игри, бројни врвни спортисти се формално вработени во воените и полициските спортски единици, па практично се на државен платен список. Во Велика Британија, спортистите добиваат финансиска поддршка од фондот на Националната лотарија, наменета за покривање на трошоците за живот и тренинг.
Тимот на САД се обидува да воведе дополнителни механизми за поддршка. Неодамна, финансиерот Рос Стивенс најави донација која на американските олимпијци ќе им обезбеди вкупно 200.000 долари бенефиции за да се намали долгорочната финансиска несигурност. Сепак, тие средства пристигнуваат по Игрите, додека спортистите со години наназад сами ги финансираат патувањата, тренерите, опремата и отсуството од редовната работа.
Додека финансискиот модел не се промени, многу олимписки кариери ќе продолжат да зависат од стабилната плата надвор од спортот.
Еве кој сè работи „втора смена“ додека брка медали:
- Рајан Кокран-Сигл – производител на јаворов сируп
Освојувачот на сребро работи во семејното производство на јаворов сируп во Вермонт. Вон сезоната, го вари сирупот или ги отстранува славините од стеблата по бербата на сокот. Студира и инженерство на Универзитетот во Вермонт.
- Кореј Дропкин – агент за недвижности
Помеѓу олимписките циклуси затвора купопродажни договори во Минесота и Висконсин. Карлингот нема гарантирани договори ниту стабилни плати, па пазарот на недвижности е неговата финансиска сигурност.
- Кори Тисе – лабораториски техничар
Работи со полно работно време во лабораторија за тестирање на квалитетот на водата, каде што анализира ниво на жива. Платата ѝ овозможува да остане во врвниот спорт.
- Пејџ Џонс – студентка по биомедицинско инженерство
Скијачките скокови ги комбинира со онлајн студии. Планира по дипломирањето да запише стоматологија. Вели дека академската работа ѝ помага да го задржи менталниот баланс.
- Морел Мекејн – кловн на родендени
Боксерката ги користела настапите на детските прослави како начин да го финансира олимпискиот сон.
- Тара Питерсон – стоматолог
Дипломирала стоматологија и денес работи во Минесота, паралелно со кариерата во карлинг.
- Табита Питерсон – фармацевт
На капитенот на американскиот карлинг-тим работата во фармацијата ѝ носи редовни примања и бара иста прецизност и концентрација како и спортот.
- Кили Кешман – бариста
Работела во семејното кафуле во мало калифорниско место, помеѓу натпреварите и закрепнувањето од повредите.
- Остин Флоријан – воздухопловен инженер
Натпреварувачот во скелетон е дипломиран инженер и работел во производствено инженерство додека ја градел олимписката кариера.
- Бредли Вилсон – сликар
Вон сезоната ги продава своите слики за да ги финансира трошоците за тренинг и натпреварувања.
- Крис Плајс – сопственик на брокерска фирма за прехранбени производи
Го презел семејниот бизнис по смртта на татко му и паралелно ја продолжил кариерата во карлинг.
- Кими Гец – вработена во финансиска компанија
Работела како процесор во финансиска фирма додека ја градела својата репутација како брза лизгачка на меѓународната сцена.
- Ли Ен Парсли – пожарникар на годината
Пред олимпиското сребро била професионален пожарникар во Охајо и добитничка на државно признание за храброст.
- Алекс Дејболд – техничар за сноуборд
Пред да освои бронза, работел како техничар кој ги подготвува даските за другите натпреварувачи.
Извор: bizlife.rs
