Логото не е само графички елемент. Тоа е жив симбол на брендот – неговиот прв впечаток, неговата визуелна хронологија. И токму затоа, не постои лого што не минува низ трансформација. Кое не расте, се адаптира и понекогаш целосно се трансформира.
Од идеја до идентитет: Првиот здив на брендот
Секоја визуелна идентификација започнува со суштината на брендот – мисија, пазар, вредности. Дизајнерите најпрво ја „лоцираат душата“, а потоа ја претвораат во форма, боја, симбол и фонт. Типографијата не е само естетика – таа зборува. Serif фонтовите навестуваат традиција, sans-serif – едноставност и модерност. Понекогаш, токму типографијата е самото лого.што е легитимен и во многу наврати добар пристап, а може да биде многу успешно, диури и безвременски.
Симболите и метафорите се тука да ја раскажат приказната. Како стрелката во логото на Amazon – дискретна, а моќна порака: од „А“ до „Ш“ (или Z), нуди сè.
Логото како жив организам: Што значи животен циклус?
Во свет на континуирани промени, логото не е исклучок. Терминот животен циклус на логото добива се поголемо значење во брендирањето. За разлика од класичниот животен циклус на производ, логото поминува низ фази:
- Создавање и основање – дефинирање на идентитетот, боите, типографијата и насоките. Во идеален случај, брендирањето и логото работат заедно – како двонасочна улица. Во голем број случаи за жал се креира знак, му се лепи типографија од името, се прогласува за лого… Се останато е стихијно.
- Проширување и адаптација – нови пазари, нови медиуми, социјални мрежи, апликации. Логото се адаптира – се создаваат вертикални и хоризонтални верзии, монохроматски варијанти, фавикони, анимации и адаптации за социјални медиуми.
- Визуелна трансформација – освежување, модернизација, но со задржан идентитет. Ова се прави кога брендот сака да остане релевантен, но да не ја изгуби довербата. Оваа фаза според мене е најтешка, затоа што треба да се справи со бремето на наследство и иднината и да извади максимум од овие два фактори што е особено комплексно.
- Целосно ребрендирање – ново лого, нова насока, нова приказна. Во овој случај, логото целосно се редизајнира. Најчесто, тоа се случува кога старата визуелна идентификација веќе не е во синхронизација со суштината на брендот.
- Рециклирање и “rollback” – враќање на старото лого поради емоционална или бизнис вредност. Некои брендови ја користат носталгијата како алатка – го враќаат старото лого во нова кампања или му даваат втор живот како sub-brand. Во ретки случаи, старото лого се враќа како основа за новата иднина.
Зошто логото не е само симбол?
Во дигитална ера, логото е првиот визуелен контакт меѓу брендот и корисникот. Без него – брендот е како глас без лице. Логото гради доверба, препознатливост, доследност. И, најважно – создава врска со публиката.
Без разлика дали станува збор за стартап, културна институција или личен бренд – логото ја носи тежината на идентитетот.
Логото е приказна што никогаш не завршува
Логото не е финален производ. Тоа е патување што постојано се надградува, адаптира и комуницира нови вредности. Со секој редизајн, адаптација или реинкарнација, логото ја раскажува еволуцијата на брендот. И најмоќните логоа се токму оние што знаат кога да се променат – и кога да останат исти.
