Дарен Моури, кој ја води глобалната организација за стартапи на Google низ Cloud, DeepMind и Alphabet, вели дека стартапите со вакви модели имаат „вклучено предупредувачко светло“, пренесува Techcrunch.
LLM wrappers се стартапи кои ги користат постојните големи јазични модели, како Claude, GPT или Gemini, додавајќи производ или корисничко искуство за решавање конкретен проблем. Пример би бил стартап што користи вештачка интелигенција за да им помогне на студентите да учат.
Ако стартапот се потпира речиси целосно на back-end модел и практично го нуди како white-labeling, индустријата веќе нема многу трпение за тоа, вели Моури, и додава дека „тенката интелектуална сопственост“ околу Gemini или GPT-5 не претставува вистинска диференцијација.
За да напредуваат и растат, стартапите мора да имаат силни конкурентски предности, било преку поширока технолошка диференцијација или длабока специјализација во одредена индустрија. Како примери за ваков пристап се наведуваат Cursor, асистент за програмирање базиран на GPT, и Harvey AI, правен асистент со вештачка интелигенција.
Со други зборови, стартапите повеќе не можат само да постават кориснички интерфејс врз GPT и да очекуваат успех како што можеби беше можно во 2024 година. Денес предизвикот е создавање одржлива вредност на производот.
Извор: Unsplash
AI агрегаторите претставуваат подгрупа на wrappers. Тие комбинираат повеќе јазични модели во еден интерфејс или API слој, овозможувајќи пренасочување на барања и пристап до различни модели. Обично нудат оркестрација, мониторинг и алатки за управување. Примери се пребарувачот Perplexity и платформата OpenRouter.
Иако многу од овие платформи стекнаа популарност, пораката на Моури до новите стартапи е јасна: да избегнуваат бизнис модел базиран на агрегирање. Според него, корисниците сакаат вградена интелектуална вредност што ќе обезбеди избор на вистински модел според потребите, а не решенија што се водат од технички ограничувања.
Моури вели дека ситуацијата наликува на раните денови на cloud компјутингот, кога стартапи препродаваа инфраструктура од AWS. Кога Amazon воведе сопствени корпоративни алатки, повеќето од тие компании исчезнаа, а преживеаја само оние што понудија вистинска додадена вредност како безбедност, миграција или DevOps услуги.
Сличен притисок денес чувствуваат AI агрегаторите, бидејќи развивачите на модели додаваат сопствени корпоративни функционалности, што може да ги направи посредниците непотребни.
Од друга страна, Моури гледа голем потенцијал во алатките за програмери и таканареченото „vibe coding“, кои во 2025 година забележаа рекорден раст и инвестиции. Тој очекува силен развој и на технологиите насочени директно кон потрошувачите, кои овозможуваат користење напредни AI алатки во секојдневната креативна работа, како што е создавање видео содржини.
Покрај вештачката интелигенција, Моури смета дека биотехнологијата и климатските технологии добиваат сè поголемо значење, поттикнати од инвестиции и огромни количини достапни податоци што овозможуваат создавање вредност на начини кои порано не биле возможни.
