Додека ВИ ги презема техничките и аналитичките задачи, човечките вештини како што се емпатија, самосвест, прилагодливост и комуникација стануваат клучни за успехот на организациите. Овие карактеристики, обединети во концептот на емоционална интелигенција (ЕИ), се важни за успешно справување на вработените со предизвиците на модерното работење.
Емоционалната интелигенција во деловната средина
Концептот на емоционална интелигенција го популаризира психологот Даниел Големан, кој ја дефинира EИ преку пет основни компоненти: самосвест, саморегулација, мотивација, емпатија и социјални вештини. Неговите истражувања покажуваат дека високото ниво на EИ придонесува кон подобро носење одлуки, поквалитетни меѓучовечки односи и поголема отпорност на стрес.
Во деловна средина, EИ игра клучна улога во лидерството, тимската работа и управувањето со промени. Лидерите со висока емоционална интелигенција подобро ги разбираат потребите на вработените, поефикасно решаваат конфликти и ги мотивираат тимовите кон продуктивна работа. Бидејќи ВИ ги презема задачите кои се базираат на логика и анализа, човечкиот фактор останува неопходен за зачувување на меѓучовечките односи и организациската култура.
Зошто е развојот на емоционалната интелигенција клучен во времето на ВИ?
- Комплементарност со ВИ
ВИ може да анализира податоци и да идентификува обрасци, но не може да ги разбере човечките емоции на истиот начин како човекот. EИ им овозможува на вработените да ја задржат емпатијата и човечката перспектива во работата со клиентите и колегите.
- Зголемена ангажираност и задоволство кај вработените
Кога се вреднуваат емоционалните вештини се зголемува чувството на припадност и мотивацијата на вработените, што резултира со помалку конфликти и поголема продуктивност.
- Отпорност на стрес и промени
ВИ носи брзи промени кои можат да создадат стрес и несигурност. Развојот на EИ ја зголемува отпорноста кон стресот и способноста за приспособување кон нови услови.
- Зајакнување на лидерството во дигиталното време
Лидерите со висока EИ се способни да инспирираат, поттикнуваат иновативност и да градат доверба, што е неопходно кога технологијата презема сѐ повеќе оперативни задачи.
SIY програма – методологија за развој на емоционалната интелигенција
Една од најефикасните програми за развој на EИ е „Search Inside Yourself“ (SIY), развиена од Google. Оваа програма ги комбинира техниките на mindfulness, невронаука и EИ за да им помогне на вработените во подобрување на фокусот, отпорноста на стрес и меѓучовечките односи.
SIY програмата се темели на три елементи:
- Внимание и свесност – преку mindfulness техниките вработените подобро ги разбираат своите емоции и управуваат со стресот.
- Саморегулација и емпатија – развивањето на свеста за емоциите на другите овозможува подобро одлучување и градење доверба во тимот.
- Цел и лидерство – помагање на вработените да најдат подлабоко значење во нивната работа преку поврзување со нивните вредности и мисија.
Заклучок
Во времето кога ВИ го менува начинот на работа, развојот на емоционалната интелигенција кај вработените станува неопходен фактор за успех. Со комбинирање на технолошкиот напредок и EИ, организациите можат не само да ги оптимизираат своите процеси, туку и да создадат одржлива иднина базирана на човечки вредности и иновации.
Извор: Bizlife.rs
