„Навистина знае да ме смири и веднаш ми е полесно“, порачува една корисничка на TikTok.
„Користењето на ChatGPT ме направи помалку анксиозна, било да се работи за излегување, здравје или кариера. Наместо да ги преплавувам родителите со пораки или да ги оптоварувам пријателите како порано, сега снимам гласовна порака со моите мисли и ја испраќам на ChatGPT. Тој ме смирува и ми дава моментално олеснување, нешто што, за жал, не е достапно за сите.“
Слично размислува и Карли, уште една корисничка на TikTok која започнала свој стартап и вели дека постојано користи ChatGPT како вид бесплатна терапија:
„Му раскажувам сé, од тоа како се чувствувам, што ми се случува, до најситните детали, исто како да зборувам со пријателка. И во замена, добивам најдобар можен совет. Може да ти даде и упатства за водење дневник. Во суштина, добиваш сѐ што ќе побараш.“
Сѐ повеќе луѓе избираат вештачка интелигенција наместо психотерапија
И тие не се исклучок. Истражувањето на платформата Tebra покажа дека еден од четворица Американци претпочита да разговара со AI четбот, отколку да оди на терапија. Сличен тренд е забележан и во Велика Британија, каде сѐ повеќе млади луѓе се одлучуваат за виртуелни AI советници бидејќи класичните психотерапии се скапи и тешко достапни.
Според пишувањето на The Times, повеќе од 16.500 луѓе во Обединетото Кралство чекаат психолошка помош повеќе од 18 месеци, што многумина ги тера да бараат побрзи и поевтини алтернативи, како што се алатки базирани на вештачка интелигенција.
Сепак, експертите упатуваат на тоа дека ваквите алатки се далеку од вистинска терапија.
„AI не е психолог, тој само глуми психолог.“
„Го испробав ChatGPT. Поставив неколку прашања да видам како одговара. Тој ги црпи информациите од интернет, ги синтетизира и го глуми психологот“, изјави д-р Коџо Сарфо, стручњак за ментално здравје и популарна личност на социјалните мрежи.
Некои специјализирани GPT модели, како Therapist GPT, се создадени токму за да даваат утеха и совети, а месечната претплата на ChatGPT Plus од 20 долари изгледа значително подостапна од традиционалната психотерапија. Но…
„Chatbot не може да постави дијагноза, да препише лекови, да го следи напредокот или да реагира во случај на сериозна криза. Може да обезбеди чувство на поддршка, но не е замена за вистински психолог“, предупредува Сарфо.
Опасна замена за лекари
Посебна загриженост предизвикува тоа што некои корисници се потпираат на AI во моменти кога навистина им е потребна стручна медицинска помош.
„Се грижам за луѓето на кои можеби навистина им треба психијатриска помош, а тие користат AI за да се чувствуваат подобро, како да им е тоа терапија. А понекогаш… терапијата и лековите се неопходни. Таква помош не може да се добие без стручни лекари. Тоа е нешто што не може да се пренесе на вештачка интелигенција.“
Сепак, некои аспекти на овие алатки може да бидат корисни, особено кога личноста се обидува подобро да го разбере својата состојба.
„На пример, ако се сомневате дека имате ADHD, ChatGPT може да ви помогне да формулирате неколку јасни реченици со кои ќе ја опишете својата состојба на лекарот. Во тој контекст, AI може да биде од помош. Но ако почнете да го користите како вистински психолог, влегувате на опасен терен“, заклучува Сарфо.
Извор: web-mind.rs
