Вештачката интелигенција станува секојдневна алатка
Генеративните AI апликации веќе не се само експеримент или забава за љубопитни корисници, тие сега генерираат сериозни приходи и бележат масовно прифаќање низ целиот свет. Во споредба со претходниот период, бројот на преземања речиси се дуплира, како и вкупните приходи, што јасно укажува на растечката побарувачка и зацврстување на позицијата на овој сегмент во дигиталната економија.
Корисниците низ светот поминале повеќе од 15 милијарди часови во интеракција со GenAI апликации во текот на првите шест месеци на 2025 година. Нивната употреба веќе не е ограничена на работното време, туку сè почесто се користат и за време на викендите и во слободно време, како дел од секојдневните активности. Тоа сведочи за промена во однесувањето и начинот на кој луѓето ја интегрираат вештачката интелигенција во своите рутини, објави порталот TechCrunch.
Апликациите како што се генератори на слики, асистенти за пишување, чет-ботови, пребарувачи со AI поддршка и алатки за едукација најмногу придонеле за овој раст. Најпопуларните меѓу нив бележат просечна употреба од повеќе од десет дена месечно и повеќе од 15 минути по сесија, што е споредливо со некои од водечките платформи денес.
Регионално гледано, најголем раст на преземања бележат пазарите на Азија и Латинска Америка, додека Северна Америка доминира во однос на приходите. Сепак, она што е заедничко за сите пазари е сé поголемото присуство на апликации кои во насловот, описот или визуелниот идентитет го користат терминот „AI“, бидејќи корисниците на глобално ниво сè почесто бараат токму такви алатки.
Интересирањето се шири и надвор од традиционалните сфери како што се ИТ и едукација. Теми како здравје, финансии, животен стил и личен развој стануваат клучни области во кои корисниците секојдневно користат вештачка интелигенција.
Паралелно со тоа, расте и бројот на апликации кои нудат претплати, напредни опции со плаќање и персонализирани AI асистенти. Моделите на монетизација се комплицираат и еволуираат, што укажува на тоа дека програмерите веќе не се потпираат само на вирален успех, туку и градат одржливи бизнис модели.
Извор: web-mind.rs
