Колку е профилот на LinkedIn личен, а колку е на (релативно кажано) компанијата? Прашањето ќе добие уште поголемо значење во иднина, бидејќи има индикации дека влијанието на LinkedIn расте.
Како што се приближуваме до 2025 година, LinkedIn станува сè поважен за брендовите, нудејќи не само платформа за видливост, развој на личен и корпоративен бренд, туку и канал за директна продажба. Повеќе од милијарда корисници гледаат можност во оваа мрежа, но само мал процент активно го користат својот целосен потенцијал за објавување содржина која директно придонесува за генерирање потенцијални клиенти.
Важноста на LinkedIn за корпоративниот идентитет
Со исклучително мал процент на корисници кои активно објавуваат, LinkedIn претставува огромен неискористен простор за компаниите и брендовите. Не само што вработените можат да дејствуваат како амбасадори на брендот (и тоа најдобри), туку соодветните објави може значително да го зголемат органскиот reach – да појаснам: без платена промоција.
LinkedIn како незаменлив продажен канал
LinkedIn, препознаен како доминантен B2B канал, ја отвора вратата за директна продажба и промоција. Со стратешки пристап и ангажман (доволни се неколку луѓе од компанијата – со конзистентен настап) се создава целосно нов продажен канал. Платформата им овозможува на компаниите да создаваат содржини што ги пренесуваат вредностите на брендот многу подобро од кој било видео запис со сценарио. Ако вработените создаваат содржина поврзана со нивната професија и знаењето за доменот, комуницираат искуство, решавање проблеми, гледаат наназад на трендовите – сето тоа има многу поголема вредност отколку кога креираат промотивна содржина во која преку voice over ќе се слуша – „Имаме големо знаење и искуство “. Максималниот ефект се добива со синергија на двата пристапи.
Извор: Freepik
Сопственост на профилот и employer branding
Профилот на LinkedIn, иако личен, станува корпоративен ентитет штом вработен ќе додаде име на компанија. Можеби метафората е слична како кога некој позајмува службено возило или уште подобар пример е фудбалски дрес. Ти си „играч“ во „тим“, со твоето презиме на дресот на кој јасно се истакнати „клупските“ (корпоративните) бои. Сè што правите на и околу теренот, добро или лошо, се рефлектира во вашиот личен идентитет, но и се поврзува со „клубот“.
Резултатите на и вон теренот стануваат многу подобри и поефикасни доколку сте во склад со вредностите на клубот и сте подготвени да ги споделите.
Стимулирање наспроти барање ангажман на LinkedIn
Кога станува збор за промовирање активно учество на вработените на LinkedIn, компаниите често се соочуваат со дилема: дали само да стимулираат или можеби да бараат ангажман. Односно, дилемата од перспектива на вработениот може да изгледа вака: „LinkedIn е мојот личен профил, што добивам јас од промовирањето на компанијата“.
Иако директното барање може да изгледа премногу авторитативно, постојат позитивни примери на компании кои сакаат да ги наградат вработените кои јавно се ангажираат на LinkedIn. Овие вработени, не само што придонесуваат за угледот на компанијата преку споделување на нивното знаење и достигнувања, туку и создаваат директна продажна вредност. Пристапот кој комбинира стимулација со признание и награди може да биде многу ефикасен, дозволувајќи им на вработените да ја почувствуваат вредноста на нивниот придонес и компанијата да профитира преку зголемена видливост и ангажираност.
Стратегии за успешен корпоративен ангажман на LinkedIn
Поттикнувањето на вработените автентично да учествуваат во креирањето на содржина што ги одразува вистинските вредности на брендот може значително да ја подобри внатрешната и надворешната репутација на компанијата. Дополнително, јасно дефинираните граници и флексибилните насоки можат да им помогнат на вработените да ги користат нивните профили на начин што позитивно придонесува за корпоративниот имиџ, без губење на нивниот личен идентитет. Не е толку комплицирано колку што може да изгледа. Со и без LinkedIn, ние го имаме нашиот професионален ангажман и нашиот личен живот, страсти и хоби. Секој ден, сите овие работи се испреплетени. Целта е да се обидеме да ги артикулираме во дигиталниот простор.
Заклучок: Подготовка за иднината
Со инвестирање во автентична корпоративна култура и одговорен пристап кон LinkedIn, компаниите можат да го искористат максимумот од оваа платформа како моќна алатка за градење силна и препознатлива корпоративна репутација. Со ангажирање на LinkedIn, компаниите не само што ја зголемуваат својата видливост, туку и генерираат значајни деловни можности кои директно влијаат на резултатите од продажбата.
Извор: Bizlife.rs
