Некогаш успехот на брендовите како LaCroix го означи почетокот на „селцер револуцијата“, кога газираната ароматизирана вода и тврдите селцери (hard seltzers) ги преплавија рафтовите. Меѓутоа, тој бран сега забавува. Заморот од газирани пијалаци, познат како seltzer fatigue, отвори простор за „мирните“ (still) пијалаци без карбонизација.
Аналитичарите од индустријата наведуваат дека растот на потрошувачката сè повеќе оди кон пијалаците без меурчиња, како во алкохолниот, така и во безалкохолниот сегмент. Наместо хард селцери, сè попопуларни се готовите коктeли и микс-пијалаци како Surfside, Sun Cruiser и BuzzBallz, кои бележат силен раст, додека газираните хард селцери се во пад.
Генерацијата З како двигател на промената
Главен двигател на промената е генерацијата З. Оваа група потрошувачи сè помалку пие газирани напитоци, а сè повеќе избира алтернативни, „полесни“ и функционални производи ладни чаеви, готови за пиење (ready-to-drink) коктели и негазирани варијанти на енергетски и велнес (wellness) пијалаци. За разлика од миленијалците, кои масовно ги прифатија селцерите, помладите потрошувачи се поотворени за постојано испробување на нови формати.
Во алкохолната индустрија тоа е особено видливо: хард селцерите бележат пад, додека премиксуваните коктели растат и до повеќе од 40% во поединечни сегменти. Surfside, бренд базиран на вотка и ладен чај, стана еден од најбрзо растечките на американскиот пазар, а неговиот успех покрена бран на слични производи.
Сличен тренд се прелева и на безалкохолните пијалаци. Иако газираните пијалаци и понатаму имаат силна позиција, компаниите како Celsius воведуваат негазирани верзии на енергетски напитоци, следејќи ја побарувачката за „помеки“, функционални пијалаци кои полесно се комбинираат со храна и не предизвикуваат непријатност како што е надуеноста.
Промена и во амбалажата
Експертите објаснуваат дека дел од потрошувачите ги доживуваат газираните пијалаци како помалку здрави, додека негазираните опции нудат впечаток на „почисто“ и поприродно искуство на консумација.
Промената се гледа и во амбалажата: сè повеќе нови пијалаци доаѓаат во лименки, дури и кога не се газирани, што дополнително ја брише границата меѓу класичните селцери и новите „мирни“ (still) напитоци.
Иако газираните пијалаци нема да исчезнат, индустријата јасно влегува во нова фаза во која меурчињата повеќе не се главниот адут.
Извор: bizlife.rs
