Новите правила ќе помогнат во намалувањето на отпадот, ублажувањето на штетата врз животната средина и создавањето рамноправни услови за компаниите кои применуваат одржливи деловни модели, овозможувајќи им да остварат корист од циркуларната економија.
Се проценува дека секоја година во Европа помеѓу 4 и 9 отсто од непродадениот текстил се уништува пред воопшто да биде носен. Овој отпад генерира околу 5,6 милиони тони емисии на CO2 што е речиси еднакво на вкупните нето емисии на Шведска од 2021 година.
Со цел да се намали оваа лоша практика, ESPR бара од компаниите да објавуваат информации за непродадените потрошувачки производи што ги исфрлаат како отпад. Исто така, се воведува забрана за уништување на непродадената облека, модните додатоци и обувките.
Делегираните и спроведените акти ќе им помогнат на претпријатијата да ги исполнат овие барања на следните начини:
- Појаснување на исклучоците: Делегираниот акт ги прецизира посебните и оправдани околности под кои уништувањето ќе биде дозволено, на пример од безбедносни причини или поради оштетување на производот. Националните органи ќе ја надгледуваат усогласеноста со правилата.
- Олеснување на објавувањето на податоците: Спроведбениот акт воведува стандардизиран формат за пријавување на количините на непродадени потрошувачки производи што компаниите ги отфрлаат. Оваа обврска ќе се применува од февруари 2027 година, со што на претпријатијата им се дава доволно време да се прилагодат.
Наместо отфрлање на залихите, компаниите се поттикнуваат поефикасно да управуваат со лагерот, подобро да ги решаваат повратите и да истражат алтернативи како што се препродажба, обнова на производите, донации или повторна употреба.
Извор: Unsplash
Забраната за уништување на непродадената облека, модните додатоци и обувките, како и предвидените исклучоци, ќе се применуваат на големите компании од 19 јули 2026 година. Средните претпријатија ги очекува примена од 2030 година. Правилата за објавување на податоците според ESPR веќе важат за големите компании, а од 2030 година ќе се применуваат и на средните претпријатија.
„Текстилниот сектор ја предводи транзицијата кон одржливост, но и понатаму постојат предизвици. Податоците за отпадот ја покажуваат потребата за дејствување. Со овие нови мерки, текстилниот сектор ќе добие поттик да премине на одржливи и циркуларни практики, додека истовремено можеме да ја зголемиме конкурентноста и да ја намалиме зависноста“, рече Џесика Росвал, комесарка за животна средина, отпорност на водните ресурси и конкурентна циркуларна економија.
Позадина
Уништувањето на непродадената стока претставува расипничка практика. Само во Франција секоја година се уништува непродадена стока во вредност од околу 630 милиони евра. Онлајн купувањето дополнително го влошува проблемот: во Германија годишно се отфрлаат речиси 20 милиони вратени производи.
Текстилот е значаен дел од проблемот и клучен фокус на дејствување. За да се намали отпадот и да се ублажи еколошкиот отпечаток на секторот, Европската комисија промовира поодржливо производство, со поддршка за европските компании да останат конкурентни.
ESPR е во центарот на тие напори. Целта е производите на пазарот на ЕУ да бидат долготрајни, попогодни за повторна употреба и рециклирање, со зголемување на ефикасноста и циркуларноста, наведено е на веб-страницата на Европската комисија.
Извор: odrzime.rs
