Кога станува збор за нејзиниот наследник во САД, Винтур најави отворање на нова функција: шеф на уредничка содржина. Идејата на оваа реорганизација е да ја ослободи од секојдневните уреднички обврски, за да може повеќе да се посвети на светските пазари на Vogue.
Како главна директорка за содржина во Condé Nast, Винтур ги надгледува сите брендови на глобално ниво, вклучувајќи ги Wired, Vanity Fair, GQ, AD, Condé Nast Traveler, Glamour, Bon Appétit, Tatler, World of Interiors, Allure, со исклучок на The New Yorker.
Израсната во новинарско опкружување
Винтур пораснала во новинарско семејство: нејзиниот татко бил уредник на London Evening Standard од 1959 до 1976 година, што ја насочило и самата да започне кариера во модното новинарство, прво во два британски магазина. Потоа се преселила во САД, каде што работела во магазини како New York и House & Garden. Во 1985 година се вратила во Велика Британија за да стане главна уредничка на британскиот Vogue, но веќе во 1988 година повторно се вратила во Њујорк за да ја наследи Грејс Мирабела на чело на американскиот Vogue. Од 2013 година, ја врши и функцијата уметничка директорка на Condé Nast.
Позната е и по својата соработка со Институтот за костими при Метрополитен музејот на уметноста, кој во 2014 година и официјално беше именуван по неа. Од 1995 година таа претседава со организацијата на годишниот настан Met Gala, а според Business Insider, нејзиното лидерство придонело за собирање на околу 186 милиони долари за Институтот. Само годинава, Met Gala за изложбата „Superfine: Tailoring Black Style“ собра рекордни 31 милион долари.
Винтур е долгогодишна поддржувачка на Демократската партија и организирала големи донаторски настани за кандидати како Барак Обама и Хилари Клинтон, која во 2016 година ја доби и првата официјална поддршка за претседателска кандидатура во историјата на Vogue.
Критикувана за недоволна разновидност во компанијата
Сепак, Винтур и Condé Nast беа предмет на критики поради недостаток на разновидност и односот кон црните и другите расни заедници во редакциите. Извештаите за „токсична култура“ во Bon Appétit доведоа до оставка на Адам Рапопорт. Во еден е-маил од 2020 година, кој протече во јавноста преку Page Six, Винтур призна дека „Vogue не направил доволно за да ги истакне и поддржи црните уредници, писатели, фотографи, дизајнери и други креативци“.
Иако наследникот сè уште не е официјално именуван, веќе се шпекулираше дека тоа би можела да биде Чиома Нади, која моментално е шеф на уредничката содржина на британскиот Vogue. Кој и да биде избран од Condé Nast (и самата Винтур), сигурно ќе наследи многу големи и темни очила за сонце.
Винтур ги презеде пошироките одговорности пред околу четири години, кога Condé Nast за првпат ја реорганизираше својата глобална уредничка структура и ги обедини редакциите ширум светот. Од тогаш, главните уредници на Vogue во земји како Јапонија, Кина, Индија, Тајван, Велика Британија, Франција, Шпанија, Германија, Италија и Блискиот Исток беа заменети со функции шефови на уредничка содржина.
Винтур често се смета за една од највлијателните – ако не и највлијателната личност во модната индустрија, а својот статус на ѕвезда го должи и на бројни поп-културни референци – од измислениот лик кој го толкува Мерил Стрип во филмот „Ѓаволот носи Прада“, до документарецот The September Issue на Р.Џ. Катлер. Нејзината препознатлива кратка фризура и големите очила одамна станаа симбол на нејзиниот имиџ, далеку надвор од светот на модата и издаваштвото.
Извор: bizlife.rs
