До 2026 година, Мета планира AI самостојно да креира реклами, од слики до текстови – без човечка интервенција.
На неодамнешното собрание на акционери, Марк Закерберг ја претстави идната визија на компанијата:
„Сакаме да стигнеме до точка каде што секоја фирма ќе може едноставно да каже што сака – да продаде производ или да привлече нови клиенти, да наведе колкав износ е подготвена да плати за резултат – и да го поврзе својот банкарски профил со нас. Ние ќе се погрижиме за сѐ останато“, изјави основачот на Мета.
Со други зборови – Мета станува целосно автоматизирана машина за приходи.
AI – новиот маркетинг стручњак
Процесот делува речиси научнофантастично во својата едноставност. Компанијата доставува слика од производот и буџет, а AI го презема сето останато: осмислување на кампањата, креирање визуели, пишување текстови, генерирање видео-материјали, избор на таргет-публика и оптимално распределување на буџетот. И сето тоа – без ниту еден вработен во маркетинг.
Мета оди и чекор подалеку со персонализација: истиот оглас нема да изгледа исто за сите корисници. Луѓето во снежни региони ќе видат автомобил што вози низ планини, додека урбаните корисници – сценарија со градски пејзажи. Сѐ се менува во реално време, според податоците за корисникот.
Овој пристап може целосно да го трансформира начинот на огласување за над 3,43 милијарди корисници на платформите на Мета. Но уште поважно – тоа е клучно за самата компанија, бидејќи 97% од нејзините приходи доаѓаат од реклами, што лани изнесуваше неверојатни 134,9 милијарди долари.
Кој има најмногу корист?
Најголем бенефит од овој систем ќе имаат малите и средни бизниси, кои немаат буџет за маркетинг-агенции. Наместо да плаќаат дизајнери, копирајтери и стратегисти, ќе биде доволно да испратат слика од производ – сѐ друго ќе го заврши вештачката интелигенција.
Мета очигледно сака да привлече илјадници нови огласувачи со овој модел. Да, тоа потенцијално ќе ја поткопа работата на помалите агенции, но во Мета тоа го нарекуваат „напредок“.
Големите брендови се скептични
Од друга страна, големите брендови се воздржани. Многумина се загрижени дека губењето контрола врз содржината може да го наруши имиџот на брендот. Актуелните реклами генерирани со AI често делуваат неприродно, бараат дополнителна обработка и не ретко – повеќе штетат отколку што користат.
Мета не е единствената што се движи кон целосна автоматизација. Google неодамна го претстави Veo, алатка за креирање видео-содржини од текст, која наскоро ќе најде примена и во маркетинг. Компании како OpenAI и Midjourney веќе интензивно се користат за креирање рекламни материјали – а Мета настојува да ги интегрира и нив во својата платформа.
Сепак, се поставува важно прашање:
Може ли вака амбициозна автоматизација да функционира глобално, кога милијарди кампањи ќе се активираат истовремено? За тоа ќе бидат потребни енормни компјутерски ресурси и специјализирани AI модели.
Извор: web-mind.rs
