Вештачката интелигенција презема нови улоги
Вештачката интелигенција станува нов член на општеството, велат резултатите од новото истражување „Возбудување, суеверие и голема несигурност – Како глобалните потрошувачи се вклучуваат во дигиталниот свет“. Истражувањето, исто така, откри дека вештачката интелигенција презема нови улоги во области каде што може да биде успешна и да ја стекне довербата на луѓето.
Според статистиката од Similarweb, ChatGPT, еден од најпопуларните чет-ботови во светот, забележал 153 милиони посети во првиот месец по лансирањето во ноември 2022 година и достигнал врв од 2 милијарди посети во април 2024 година. Поради брзиот напредок на вештачката интелигенција, компанијата Kaspersky спроведе детална студија за да ги истражи тековните нивоа на доверба во вештачката интелигенција. Студијата ги испитува нејзините улоги, од раководни позиции во компаниите до помагање во донесувањето значајни животни одлуки.
Според студијата, испитаниците ја гледаат вештачката интелигенција како член на својот тим на работа, но и како менаџер – 34% веруваат дека вештачката интелигенција може да биде поправичен менаџер од човекот, се вели во соопштението на компанијата Kaspersky.
Друга област каде што ВИ може да игра активна улога е образованието. Скоро половина од испитаниците (47%) предвидуваат дека децата во блиска иднина ќе бидат подучувани виртуелно и преку Метаверзум.
Половина од сите потрошувачи (50%) веруваат дека вештачката интелигенција веќе станала незаменлив дел од нивните животи, а 43% имаат позитивен поглед на нејзиниот потенцијал да донесе многу возбудливи можности и да ја подобри иднината за сите. Повеќето испитаници признаваат дека ВИ има способности во креативни области – 62% веруваат дека ВИ е кредибилен производител на уметнички дела.
Вештачката интелигенција може да се смета и за доверлив придружник и помошник во секојдневниот живот. Повеќе од половина од испитаниците (57%) би сакале да користат вештачка интелигенција за поефикасно водење на својот секојдневен живот.
Скоро половина од испитаниците (48%) се подготвени да користат ВИ чет-бот за разговори на мрежа, а 31% би го користеле за да им помогне да го најдат вистинскиот партнер на апликација за запознавање. Дури 48% веруваат дека човечките односи ќе се променат поради влијанието на вештачката интелигенција, ако виртуелните ликови почнат да ги заменуваат партнерите од реалниот живот.
„Сведоци сме на сè поголемо усвојување на вештачката интелигенција како вредна алатка која им помага на луѓето во различни области. Покрај основните примени како што се обработка и анализа на податоци, на вештачката интелигенција ѝ се доверуваат и интригантни лични улоги, вклучувајќи романса, образование и работа. Како што технологиите на вештачка интелигенција продолжуваат да се развиваат, нивниот потенцијал да поттикнуваат иновации и да ги подобруваат човечките искуства станува сè посеопфатен. Сепак, овој напредок, исто така, носи неочекувани ризици и софистицирани закани, почнувајќи од прекумерно користење – преголема доверба во советите на вештачката интелигенција – до фишинг генериран од вештачка интелигенција, дипфејк и кражба на идентитет. Ова се предизвици со кои треба да се справиме на повеќе нивоа“, вели Драган Давидовиќ, генерален директор на компанијата Kaspersky за Источна Европа.
