Иако на почетокот владееше огромен интерес и сите сакаа покана за пристап, се испостави дека оваа „AI-first“ социјална мрежа нема долгорочна одржливост.
TikTok, но со „дипфејкови“ (deepfakes)
Sora беше замислена како верзија на TikTok заснована на вештачка интелигенција со препознатлив вертикален feed, но со клучна разлика: содржината можеше да се генерира со помош на AI. Нејзината најконтроверзна функција беше опцијата (прво наречена „cameo“, подоцна „characters“) која им овозможуваше на корисниците да го скенираат своето лице и да прават реалистични дипфејк видеоснимки.
Уште попроблематично тие „ликови“ можеа да бидат јавни, што значеше дека секој можеше да прави видеосодржини користејќи туѓ дигитален идентитет.
Интернетот го направи она што најдобро го знае
Во пракса, апликацијата многу брзо се претвори во хаотичен експеримент. Feed-от беше преплавен со бизарни и вознемирувачки снимки, вклучувајќи и дипфејк верзии на извршниот директор Сем Алтман во надреални и морбидни сценарија.
Иако постоеше забрана за користење ликови на јавни личности без дозвола, заштитните механизми лесно се заобиколуваа. Набрзо се појавија снимки од историски личности како Мартин Лутер Кинг и познати актери како Робин Вилијамс, што предизвика остри реакции од нивните семејства и јавни апели за отстранување на содржините.
Од мемиња до правни проблеми и пропаднати договори
Корисниците почнаа да генерираат содржини со познати ликови од поп-културата, што отвори сериозни прашања за авторските права. Интернетот беше преплавен со апсурдни сцени: Супер Марио во несоодветни ситуации или Пикачу во ASMR видеа.
Во еден момент, компанијата The Walt Disney Company наместо тужба, понуди соработка инвестиција од милијарда долари и лиценцен договор за легално користење на ликовите од франшизите на Marvel, Pixar и Star Wars. Тоа можеше да биде пресвртница за AI индустријата, но со гасењето на Sora, исчезна и тој договор. Парите, според достапните информации, никогаш не биле исплатени.
Од огромен „хајп“ до нагол пад
На врвот на својата популарност во ноември, Sora имаше повеќе од 3,3 милиони преземања. Меѓутоа, веќе до февруари тој број драстично падна на околу 1,1 милион. За споредба, ChatGPT денес има околу 900 милиони неделно активни корисници, што покажува дека Sora не успеала да го задржи вниманието на пошироката јавност.
Вкупната заработка на апликацијата се проценува на околу 2,1 милион долари, главно преку купување кредити за генерирање видеа. Ова е релативно скромен резултат за проект од ваков обем и за компанија како OpenAI, која вложи огромни ресурси во развојот на оваа технологија.
Технологијата останува, само ја менува формата
Иако апликацијата исчезнува, технологијата зад неа не си оди. Моделот за генерирање видео Sora 2 и понатаму постои само што сега е достапен преку претплатнички модел во рамките на ChatGPT. OpenAI не е единствениот играч; сè поголем број компании развиваат слични алатки, што значи дека е само прашање на време кога ќе се појави нова верзија на ваква платформа.
Sora можеби не опстана, но отвори сериозни прашања: каде е границата меѓу креативноста и злоупотребата и колку сме навистина подготвени за свет во кој секој може да направи „видео“ од кој било?
Извор: webmind.rs
