Според информациите од компанијата, GPT-5 има значително понапредни способности за пишување, поретко дава неточни одговори кога не е сигурен во информациите и подобро реагира на здравствени прашања, вклучувајќи предупредувања за можни медицински проблеми.
Моделот сега располага и со таканаречени „агентни“ способности, што значи дека може самостојно да развива код, да креира веб-страници, апликации и видео-игри, како и да се интегрира со алатки како Gmail и Google Календар, пренесува Euronews.
Корисниците на истражувачката верзија на ChatGPT ќе можат да избираат меѓу четири различни „личности“ на ботот.
Најавата се појави рано наутро во четврток преку GitHub, но беше брзо отстранета.
Оваа верзија пристигнува само неколку дена по објавувањето на open-source моделот gpt-oss – првпат по GPT-2 во 2019 година – што им овозможува на корисниците да го прилагодат моделот според сопствените потреби.
Зошто е ова важно?
Ова претставува голем чекор кон агентна вештачка интелигенција – системи што можат да извршуваат сложени, повеќечекорни задачи, да користат различни алатки, да пребаруваат информации на интернет и да комуницираат со корисници без директни инструкции.
На пример, AI агент во корисничка поддршка може сам да постави дополнителни прашања, да најде одговори во интерни документи и да го реши проблемот – или, доколку е потребно, да вклучи човек.
Извршниот директор на OpenAI, Сем Алтман, претходно изјави дека AI агентите наскоро ќе „влезат во работната сила“ и значително ќе го променат начинот на кој функционираат компаниите.
Тој го даде примерот со AI агент во улога на софтверски инженер, кој може да заврши најголем дел од задачите како искусен програмер, иако сè уште е потребен надзор и не носи револуционерни идеи.
OpenAI не е прв во оваа област – Microsoft и Google веќе лансираа сопствени AI агенти што можат да се приспособат на потребите на компаниите.
Извор: Bizlife.rs
