Купувањето преку интернет доби моќен нов асистент – и тоа без досадни банери и спонзорирани резултати. OpenAI ја воведе новата функционалност во својот четбот ChatGPT, која им овозможува на корисниците да бараат производи користејќи обичен, природен јазик, а потоа да добијат детални препораки со слики, цени, оценки и рецензии.
Оваа функција во моментот е достапна за корисниците на ChatGPT Plus планот, кој го користи најновиот модел GPT-4 Turbo. Кога, на пример, корисник ќе напише „Препорачај ми слушалки за трчање под 100 долари“, ChatGPT пребарува доверливи извори и прикажува листа на производи без никакви реклами или платени позиции, пренесува порталот Arstechnica.
За разлика од класичните пребарувачи, каде што првите резултати често се спонзорирани линкови, ChatGPT користи независни податоци и се фокусира на конкретните потреби на корисникот. Препорачаните производи доаѓаат со можност за директно пренасочување на веб-страницата на продавачот, каде што може да се заврши купувањето.
Ова е дел од пошироката стратегија на OpenAI да го позиционира ChatGPT не само како алатка за разговор и информирање, туку и како практичен асистент во секојдневниот живот, од планирање оброци до избор на подароци.
Ако досега вештачката интелигенција се користеше за пишување текстови, анализи и кодирање, сега е јасно дека влегува и на полето на е-трговијата и тоа со голем замав.
Извор: bizlife.rs
