Ова се некои од нив, пионерки чии изуми го променија начинот на кој живееме.
Хеди Ламар (Hedy Lamarr)
Австриско-американската актерка Хеди Ламар била многу повеќе од холивудска ѕвезда. За време на Втората светска војна, заедно со композиторот Џорџ Антајл, развила систем за „скокање на фреквенциите“ (frequency hopping) кој требало да овозможи безбедно наведување на торпедата без попречување на сигналот. Иако технологијата во тоа време не била веднаш применета, нејзиниот принцип подоцна станал основа за модерните безжични комуникации, вклучувајќи ги Wi-Fi, Bluetooth и GPS.
Мери Андерсон (Mary Anderson)
Возењето по дожд или снег денес е незамисливо без бришачите на автомобилите. Токму тоа решение го осмислила американската претприемачка Мери Андерсон на почетокот на 20 век. Откако забележала колку им е тешко на возачите да гледаат низ мокрото ветробранско стакло, во 1903 година го патентирала првиот функционален бришач кој се придвижувал рачно од внатрешноста на возилото. Нејзиниот изум стана стандардна опрема на автомобилите ширум светот.
Џозефина Кокран (Josephine Cochrane)
Машината за миење садови денес е дел од речиси секоја модерна кујна, но нејзиното настанување и се должи на Џозефина Кокран. Таа во 1886 година ја конструирала првата практична механичка машина за миење садови, бидејќи сакала да го заштити својот порцелан од кршење при рачното миење. Нејзиниот изум набрзо почнале да го користат хотелите и рестораните, а подоцна стана незаменлив домашен апарат.
Маргарет Е. Најт (Margaret E. Knight)
Американската пронаоѓачка Маргарет Е. Најт останала запаметена по изумот на машината која овозможила производство на хартиени кеси со рамно дно, какви што и денес се користат ширум светот. Својот патент го добила во 1871 година, а нејзиниот изум овозможил хартиените кеси да бидат стабилни и практични за пакување на стока. Поради големиот број патенти што ги пријавила во текот на животот, често ја нарекувале и „женскиот Едисон“. Нејзиното решение значајно влијаело на развојот на амбалажната индустрија и секојдневната трговија.
Алис Х. Паркер (Alice H. Parker)
Американската изумителка Алис Х. Паркер во 1919 година го патентирала системот за централно греење на гас. Нејзината идеја била револуционерна бидејќи овозможувала загревање на повеќе простории во куќата со помош на една централна печка и мрежа од канали за распределба на топлината. Во време кога домовите главно користеле камини или печки на дрва во секоја просторија, системот на Паркер претставувал важен чекор кон модерните системи за централно греење какви што познаваме денес.
Флоренс Парпарт (Florence Parpart)
Позната по унапредувањето и популаризацијата на електричниот фрижидер на почетокот на 20 век, со што чувањето на храната станало многу побезбедно и попрактично. Исто така, патентирала и рана верзија на машина за чистење на улиците, што придонело за модерните комунални возила за одржување на градовите.
Приказните на овие жени покажуваат дека иновациите не доаѓаат само од големите лаборатории или корпорации; често настануваат од секојдневните проблеми, љубопитноста и желбата светот да се направи подобар. На Денот на жената, нивните изуми нè потсетуваат дека придонесите на жените се длабоко вткаени во технологијата, науката и секојдневниот живот каков што го познаваме денес.
Извор: bizlife.rs
