Иако ПР-от одамна еволуираше од само „спамирање“ со досадни соопштенија и организирање на застарени прес конференции, сепак, некои практики кои знаат да ги иритираат медиумите сè уште опстојуваат, држејќи се до познатото: „Затоа што секогаш сме го правеле тоа така“.
И сега сигурно ќе речете дека во целата ПР комуникација, голем удел имаат и желбите и идеите на клиентите, сепак, ако мудро поставите иновативна и креативна стратегија, бидете сигурни дека медиумите ќе ве обожуваат!
Омразената прва реченица на прес соопштенијата
Прес соопштенијата не се мртви, но нивните почетни реченици често изгледаат безживотни. Типичната формула – „Тој и тој, водечкиот македонски лидер во индустријата, објавува нешто незначително“ – треба да се промени. Да, горди сте на вашето достигнување, производ, што и да е, но овие фрази се толку излитени што не само медиумите, туку и читателот го наведуваат да преврти со очи.
Зошто е важно:
- Според анкета на Cision, 48% од новинарите добиваат до 50 соопштенија неделно, но само 3% велат дека соопштенијата што ги добиваат се релевантни.
Како да напишете релевантно соопштение:
- Пишувајте соопштенија само кога имате вистинска вест.
- Напишете го воведот како новинар: фокусирајте се на веста, а не на самопромоција.
- Избегнувајте го жаргонот „најдобри, лидери, водечки, најпознатите…“. Чувајте ги пофалбите за крајот.
- Напишете ја приказната како што би се појавила во некој од најпознатите „весници“
- Создадете интересни наративи околу податоците, истакнувајќи трендови, предизвици и можности.
- Фокусирајте се на хуманиот елемент на вашата приказна со истакнување на реални приказни, сведоштва и студии на случаи.
- Истакнете како вашиот производ, услуга или иницијатива позитивно влијае на поединците и заедниците.
Внесете иновативност:
Креативните и иновативни техники за ПР се клучни за да го привлечат вниманието на медиумите во свет каде што информациите се пренесуваат брзо и вниманието е кратко. Тука иновативноста е клучна:
- Претворете го вашето соопштение во интересен и визуелно привлечен инфографик.
- Истакнете ги клучните точки, податоци и цитати во визуелно пријатен формат кој е лесен за споделување.
- Видео соопштение? Зошто да не! Раскажете ја вашата приказна на динамичен и интересен начин.
- Вклучете интервјуа и backstage снимки медиумските куќи можат да ги користат.
- Понудете ексклузивни прегледи или пристап до она што го промовирате, настан или приказна пред да станат јавни.
- Организирајте приватни медиумски настани или виртуелни прегледи за да изградите очекувања и интерес.
Досадни фотографии
Визуелните елементи се клучни во денешниот комуникациски пејзаж, но лошите фотографии можат да ја поткопаат вашата порака. Сите сме ги виделе истите досадни слики: голем чек за донација, гигантските ножици како сечат лента, дотерани фаци на работна акција.
Зошто е важно:
- Студија на Sproutworth покажува дека содржината со релевантни слики добива 94% повеќе прегледи од содржината без слики.
Што да направите?:
- Обезбедете јасни упатства на фотографот за да бидете сигурни дека ќе добиете висококвалитетни, креативни слики.
- Бидете креативни со групни фотографии: менувајте перспективи, додавајте движење и фокусирајте се на лицата.
- Користете натписи за да раскажете приказна, а не само да ја опишете сликата.
Претрупани е-мејлови
Позадината и контекстот се важни, но не на почетокот на е-мејлот. Е-мејлот што започнува со долг вовед често ја закопуваат суштината, фрустрирајќи ги оние кои ја добиваат.
Извор: Unsplash / Austin Distel
Зошто е важно:
- Истражувањето на Radicati Group покажува дека просечниот канцелариски работник прима 121 е-мејл дневно. Јасните и концизни е-мејлови имаат поголеми шанси да бидат прочитани и да се преземе акција.
Што да направите:
- Ставете ги важните информации напред. Резимирајте ги клучните точки во првиот параграф.
- Користете булет точки и поднаслови за да ги водите читателите низ содржината.
- Наведете дека подетални информации може да најдат во текстот кој ќе го прикачите во прилог на е-мејлот.
Празни изјави
Она што треба да биде најлесно и најважно, се уште е најлошиот дел од целото соопштение. Зошто? Изјавите во прес соопштенијата и статиите често не додаваат вистинска вредност бидејќи се полни со корпоративен жаргон и без вистински емоции.
Зошто е важно:
- Студијата на Nielsen Norman Group покажа дека корисниците внимателно ги читаат цитатите, особено оние што пренесуваат лични мисли или силни мислења.
Извор: Unsplash / AbsolutVision
Што да направите наместо тоа:
- Фокусирајте се на емоциите и значењето наместо на фактите и бројките.
- Држете ги цитатите кратки и моќни.