Во ерата на хиперпродуктивност и постојана достапност, највредниот статусен симбол повеќе не е Tesla, скап часовник или канцеларија на последниот кат туку вистински, искрен, дигитално замолчен одмор. Оние што можат да си го дозволат луксузот на недостапност, испраќаат јасна порака: „Толку добро ја вршам работата, што можам и да исчезнам.“
Во свет каде што достапноста е новата норма, недостапноста станува вистински луксуз. Оние што навистина умеат да се исклучат – без грижа на совест, без „само да проверам мејл“ често се токму оние кои се на самиот врв.
CEO и Out of Office пораки
Сè почесто се појавуваат креативни Out of Office пораки кои не се само информативни, туку вистински став.
Една директорка на комуникации напиша:
„Во моментов сум на одмор и се обидувам да ја заборавам лозинката од мејлот. Ако ме пронајдеш значи нешто не е во ред.“
Еден CEO напиша:
„На планина сум. Телефонот нема сигнал, а ни јас волја.“
Овој тренд испраќа важна порака: се нормализира правото на одмор. И тоа не било каков – туку целосен. Таков што подразбира недостапност на Slack, Zoom и WhatsApp. Компаниите што го поддржуваат ова, често имаат посреќни и попродуктивни тимови.
Во нашиот регион, сепак, сè уште често практикуваме „лажен одмор“. Носиме лаптоп на море, читаме мејлови додека децата скокаат во плиткото и одговараме на клиенти со пешкир на глава.
Но, можеби е време да го преиспитаме значењето на успехот. Зашто, ако не можеш да отидеш на одмор без лаптоп – можеби работата управува со твојот живот, а не обратно.
И за крај: ако не знаеш како да напишеш Out of Office порака – тоа е првиот знак дека навистина ти треба пауза.
Извор: bizlife.rs
