Tesla ја тестира иднината на такси услугите преку сопствени автономни возења
Tesla неодамна започна со тестирање на својата долгонајавувана автономна такси услуга, засега само интерно, меѓу вработените во компанијата. Оваа пилот програма се спроведува во Остин и областа на заливот Сан Франциско, користејќи ја најновата верзија на системот „Full Self-Driving Supervised“ (FSD Supervised).
За разлика од целосно автономните возила без возач, тековното тестирање подразбира присуство на возач надзорник кој го следи текот на патувањето и интервенира по потреба. Во првите неколку месеци од тестирањето се реализирани над 1.500 возења, при што тест возилата поминале повеќе од 24.000 километри. Целта на овие активности не е само техничко тестирање на возилата, туку и валидација на целокупната инфраструктура, вклучувајќи мобилни апликации за корисниците, контролните центри и операциите за далечинска поддршка.
Програмата се потпира на интерните ресурси на Tesla со цел дополнително да ја унапреди технологијата FSD и да се подготви за следните фази на развој. Иако минатата година компанијата го најави моделот Cybercab како целосно автономно возило, неговото комерцијално претставување се очекува дури во 2026 година. Пред тоа, Tesla планира во текот на 2025 да ја лансира услугата со робот-таксисти без возачи во Тексас и Калифорнија, под услов да ги добие сите неопходни регулаторни одобренија, објави порталот Mashable.
Оваа фаза на тестирање со вработените покажува колку Tesla е посветена на визијата за автономна мобилност и настојува чекор по чекор да обезбеди квалитет, безбедност и доверливост на системот пред да го понуди на пошироката јавност. Освен технолошките предизвици, компанијата се соочува и со сериозни регулаторни процедури, особено во подрачја каде што правилата за автономни возила сè уште се строги и во развој.
За сега, во рамки на Tesla владее оптимизам дека овие рани тестирања ќе помогнат побрзо да се надминат последните пречки на патот кон создавање вистинска мрежа на самоуправувачки такси возила што претставува еден од клучните чекори во долгорочната стратегија на Tesla за иднината на мобилноста.
Извор: web-mind.rs
