Фотографиите се користеле за тренирање на ВИ со цел да се поврзат гените со изгледот на лицето, нешто што е контроверзно бидејќи може да доведе до злоупотреби како биометриски надзор и дискриминација.
Иако компанијата подоцна ги заштитила податоците, експертите нагласуваат дека ваквите протекувања се особено ризични бидејќи се работи за биометриски податоци кои не можат да се променат, како отпечатокот од прст или изгледот на лицето.
Загрижувачки последици за биометриската приватност
Биометриските податоци, како што се фотографии на лицето, не можат да се менуваат како лозинка или број на кредитна картичка. Тие штом еднаш „протечат“, последиците се трајни.
„Ова не е само проблем со приватноста, претставува и прашање на биометриска безбедност. Кога вашите податоци ќе завршат во погрешни раце, потенцијалот за злоупотреба е огромен,“ изјави еден експерт за сајбер безбедност за списанието Wired.
Загриженоста дополнително расте со оглед на тоа што технологии како системите за препознавање лица, надзорни камери и ВИ модели за идентификација можат да ги користат овие податоци без знаење или согласност на корисниците.
Етиката во ВИ и генетиката под знак прашалник
GenoME е една од компаниите кои користат напредни алатки за вештачка интелигенција за поврзување на ДНК со физичките особини, што често се претставува како напредок во персонализираната медицина и разбирањето на човечката генетика. Сепак, сè почесто се отвораат етички дилеми, дали ваквите проекти ја преминуваат границата помеѓу науката и потенцијалната дискриминација?
Критичарите предупредуваат дека ВИ моделите обучени за вакви податоци би можеле да се користат за расно профилирање, автоматска селекција на кандидати за работа, па дури и за владини цели. Без јасни регулативи и правила за употреба на чувствителни податоци, ваквите инциденти стануваат сè поопасен преседан.
Случајот со GenoME како предупредување за иднината
Овој инцидент претставува уште едно потсетување за тоа колку се ранливи базите на податоци во ВИ истражувањата и колку е важно компаниите што ракуваат со биометриски и генетски податоци да вложат максимални напори за заштита на своите корисници.
GenoME сè уште нема објавено официјално соопштение, но се очекува надлежните органи во Сингапур, како и меѓународните регулатори, да го истражат случајот и да воведат построги контроли врз работата на слични ВИ проекти.
Извор: web-mind.rs
