Ниту една друга земја досега нема преземено толку сеопфатни мерки, а спроведувањето на новиот закон внимателно го следат законодавци ширум светот. Десетте забранети платформи – Instagram, Facebook, Threads, Snapchat, YouTube, TikTok, Kick, Reddit, Twitch и X – тврдат дека ќе ја почитуваат забраната, користејќи технологија за верификација на возраста за да ги идентификуваат корисниците помлади од 16 години и да ги суспендираат нивните профили, но сметаат дека ова нема нужно да ги направи децата побезбедни. Премиерот Ентони Албанезе изјави дека ова е „ден на кој Австралија може да биде горда.“
„Ова е ден кога австралиските семејства ја преземаат контролата од големите технолошки компании. Ова го потврдува правото на децата да бидат деца и правото на родителите на поголем мир,“ рече Албанезе за јавниот сервис ABC во средата. Сепак, тој призна дека „нема да биде едноставно.“ Според законот, платформите мора да покажат дека презеле „разумни чекори“ за да ги деактивираат профилите користени од лица помлади од 16 години и да спречат отворање нови профили, доколку сакаат да избегнат казни до 49,5 милиони австралиски долари (32 милиони американски долари). Се очекува дел од децата – и нивните родители – да ја игнорираат забраната, но за тоа нема да има последици.
Што прават платформите
Snapchat: Профилите на корисници помлади од 16 години ќе бидат суспендирани на три години или сè додека не наполнат 16 години.
YouTube: Сопствениците на профили автоматски ќе бидат одјавени на 10 декември. Нивните канали повеќе нема да бидат видливи, но податоците ќе бидат зачувани за да можат повторно да ги активираат профилите кога ќе наполнат 16 години. Децата и понатаму ќе можат да гледаат YouTube без да се најават, пишува CNN.
TikTok: Сите профили што ги користат лица помлади од 16 години ќе бидат деактивирани на 10 декември. Платформата тврди дека не е важно која e-mail адреса е користена или чиe име стои на профилот – технологијата за верификација на возраста ќе утврди кој го користи. Содржината што претходно ја објавиле младите корисници повеќе нема да биде видлива. Платформата, исто така, ги повикува родителите кои се сомневаат дека нивните деца лажеле за возраста при отворање на профил да ги пријават.
Twitch: Од 10 декември, ниту едно дете помладо од 16 години во Австралија нема да може да креира нов профил на оваа популарна гејмерска платформа, додека постојните профили на помлади од 16 години нема да бидат деактивирани до 9 јануари. Компанијата не одговори на барањето за објаснување на доцнењето.
Meta: На 4 декември започна со отстранување профили на тинејџери помлади од 16 години на Instagram, Facebook и Threads. Корисниците беа повикани да ја преземат својата содржина, која ќе биде зачувана доколку сакаат да го реактивираат профилот кога ќе наполнат 16 години.
Извор: bizlife.rs
