Реални цели и организација на првиот работен ден
Првиот работен ден по одмор многумина го опишуваат како „удар на ладен бран“. Натрупани мејлови, пораки од колегите и барања од клиенти можат да делуваат обесхрабрувачки. Затоа експертите препорачуваат да не се брка веднаш заостанатото темпо, туку денот да се организира преку реални и помали задачи.
Еден од начините е методот на „time-blocking“ – поделба на денот во временски блокови посветени на одредени задачи.
На пример, првиот блок наутро може да биде резервиран за одговарање на најважните мејлови, додека попладне се остава за стратешка работа на проекти. Така се избегнува преголема оптовареност, а денот станува појасен и поефикасен.
Психолозите нагласуваат дека токму ваквата постепена адаптација е најдобриот начин да се намали стресот и да се врати чувството на контрола, пренесува порталот AdelPersonnel.
Тимски дух и грижа за менталното здравје
Привикнувањето на канцелариската средина не зависи само од личните навики, туку и од тимската атмосфера. Краток состанок за добредојде или т.н. „reconnection huddle“ може да им помогне на вработените повторно да се поврзат. Во некои компании тоа е петнаесетминутен брифинг со кафе, каде што колегите ги разменуваат впечатоците од одмор и пренесуваат важни новости.
Компаниите што внимаваат на добросостојбата на своите вработени одат и чекор понатаму. Во одредени ИТ фирми, враќањето од одмор се одбележува со заеднички ручек или неформален тим-билдинг. „На тој начин испраќаме порака дека ни е важно здравјето на луѓето, а не само резултатите“, истакнува една HR менаџерка.
Подеднакво е значајно да се внимава и на менталното здравје. Кратки прошетки околу зградата, вежби за дишење или десетминутна медитација во текот на денот можат да направат голема разлика. Експертите препорачуваат и поставување јасни граници: исклучување на деловните известувања по завршување на работното време или договор со тимот за рамномерна распределба на задачите во првите денови.
Добри примери сè почесто се гледаат и кај странските работодавачи. Некои компании во САД воведуваат т.н. „re-entry day“, кога првиот ден по одмор се користи исклучиво за планирање и разговори, а вистинските работни задачи се оставаат за следниот ден.
Извор: odrzime.rs
