Анализата на Euronews Business покажува значителни разлики во животниот стандард на работниците со минимална плата во различни делови на Европа.
Според најновите податоци од јануари 2025 година, во 10 од 22 земји на ЕУ, месечната бруто минимална плата сè уште е под 1.000 евра.
Дури и кога бројките се прилагодени според стандардите на куповната моќ (PPS), разликите остануваат значителни. На пример, минималната плата во Германија е повеќе од двојно повисока од онаа во Бугарија, кога се зема предвид куповната моќ.
Според податоците на Евростат, бруто месечните минимални плати во ЕУ се движат од најниските 551 евра во Бугарија до највисоките 2.638 евра во Луксембург.
Меѓу земјите-кандидати, Молдавија бележи најниска минимална плата од 285 евра. Важно е да се напомене дека пет земји-членки на ЕУ – Данска, Италија, Австрија, Финска и Шведска – немаат национално утврдена минимална плата.
Кога платите се споредуваат според куповната моќ (PPS), разликите стануваат помалку драматични. Додека номинално еден работник во Луксембург заработува речиси пет пати повеќе од неговиот колега во Бугарија, во однос на куповната моќ, таа разлика се намалува на 2,3 пати. Според PPS анализата, Германија (1992) има највисока ефективна минимална плата, додека Естонија (878) бележи најниска.
Споредба на номиналните плати и куповната моќ
Особено е интересно како поединечни земји се позиционираат поинаку кога се споредуваат номиналните плати и куповната моќ. На пример, Романија се искачува за осум места, а Црна Гора за пет, што покажува дека, иако нивните номинални плати се пониски, тие овозможуваат подобар животен стандард отколку што изгледа на прв поглед.
Слично подобрување на позицијата бележат Унгарија, Србија и Бугарија. Од друга страна, Ирска паѓа од второ на петто место, а Естонија речиси до самото дно, што укажува на високите трошоци за живот во овие земји. Хрватска останува во средината, со благо подобрување кога се зема предвид куповната моќ.
Од 24 анализирани земји, само четири забележале реален пад на минималната плата, при споредба на растот на заработките со инфлацијата. Најтешко погодена е Турција, каде што, при инфлација од 44,4%, минималната плата пораснала за само 3%.
Кипар, Албанија и Белгија забележуваат благ реален пад на минималната плата. Од друга страна, Црна Гора води во реалниот раст, со номинално зголемување од 25,9%, додека инфлацијата изнесува само 2,6%, што резултира со значително зголемување на куповната моќ. Значителен реален раст бележат и Романија, Бугарија, Хрватска и Литванија.
Новата Директива на ЕУ за минималната плата, која има за цел нејзино поставување на 60% од просечната бруто плата, веќе покажува влијание. Според експертите од Eurofound, Кристин Аумајр-Пинтар и Карлос Вакас-Сориано, оваа директива поттикнала зголемувања на минималните плати во неколку земји и се очекува да остане клучен двигател на растот во иднина.
Извор: Bizlife.rs
