Според PepsiCo, овој нов успех следи по инвестицијата од 27 милиони евра (29 милиони долари) во проекти за иновации и одржливост во фабриката во изминатите пет години, со дополнителен проект за електрификација фокусиран на декарбонизација вреден 5 милиони евра, пренесува ESG Today.
Фабриката, која се наоѓа во провинцијата Алава во Баскија, произведува Pepsi, како и локални брендови KAS и Bitter KAS. Фабриката користи електрична енергија од обновливи извори уште од 2015 година, а со новиот проект за електрификација, кој следеше по пилот-програмата, ќе се замени преостанатиот природен гас со електрична енергија, што ќе овозможи 100% електрификација на објектот. Според PepsiCo, електрификацијата на операциите во фабриката ќе елиминира 1.849 тони CO2 годишно.
Пол Кодина, генерален директор на PepsiCo за Југозападна Европа, рече: „Исклучително сум горд што нашата фабрика за пијалаци во Алава има за цел да стане прва од нашата компанија во светот која ќе постигне нето нула емисии следната година. Оваа одлична вест се совпаѓа со многу посебен датум за нас, нашата 50-годишнина. Свесни сме дека ни претстои долго патување за да го декарбонизираме целиот наш синџир на вредности, а за да го постигнеме тоа, се надеваме дека можеме да сметаме на максималната соработка на сите наши партнери“.
Овој нов успех следи откако PepsiCo во 2021 година ја претстави својата сеопфатна рамка за одржливост, pep+, која опфаќа широк спектар на иницијативи за ESG поврзани со земјоделските практики, климата, одржливоста на водата, амбалажата и здравјето на потрошувачите. Цели за одржливост на компанијата се да постигне нето нула емисии до 2040 година и активно да придонесе за одржливо управување и обновување на водните ресурси до 2030 година.
Во Шпанија, компанијата лансираше 100% рециклирани пластични шишиња за целата своја линија Pepsi во 2021 година, заедно со новото картонско решение за групирање лименки. Во 2022 година, PepsiCo, исто така, најави договор со Iberdrol за набавка на обновлива енергија за напојување на 100% од нејзините локации во Шпанија и Португалија.
Во 2023 година PepsiCo отвори фабрика во Полска вредна 300 милиони евра. Компанијата оваа фабрика ја опишува како нејзина најзелена фабрика во Европа, која вклучува употреба на обновливи извори на енергија за работење и низа мерки за кружна економија за намалување на отпадот од вода и справување со глобалните предизвици во системот на храна. Фабриката во Środi Śląska треба да стане климатски неутрална до 2035 година.
Арчана Јаганнатан, директор за одржливост во PepsiCo за Европа, вели: „Како една од најголемите компании за храна и пијалаци во светот, знаеме дека имаме клучна улога во справувањето со климатските промени. Овој голем успех на нашата шпанска фабрика е доказ за нашата решеност да преминеме на нето нула емисии во целиот наш синџир на вредности, водејќи го движењето кон поодржлива иднина за нашата планета и луѓето“.
