Во нов тренд кој делува речиси како „телефонска игра на кукавичлук“, младите луѓе изгледа ја префрлаат одговорноста за започнување разговор врз оној што се јавува. Наместо класичен поздрав, другата страна често слуша – ништо освен тивко дишење.
„Слушам само дишење… и тишина“
Една рекрутерка неодамна сподели свое искуство на социјалната мрежа X:
„Една работа која особено ја забележувам кај Генерација Z е дека се јавуваат на телефон и не зборуваат ништо. Само слушам дишење и звуци од позадина, додека чекаат јас да кажам прва ‘здраво’.“
Иронијата е што воопшто не станувало збор за изненадувачки повик, туку за однапред закажано интервју во време што самиот кандидат го избрал.
Истражувањата го потврдуваат феноменот
Истражување на YouGov спроведено минатата година покажа дека секој четврти Британец на возраст од 18 до 24 години смета дека е во ред да се одговори на повик без поздрав.
Оваа навика пак, постарите генерации ја доживуваат како крајно непристојна. Само 27% од луѓето на возраст од 25 до 34 години ја оправдуваат оваа пракса, а процентот опаѓа на само 14% кај оние над 45 години.
„Сите ние се јавуваме на телефон. Тоа е како да отвораш врата. Не е само прашање на љубезност, туку и сигнал дека си присутен и подготвен за разговор“ – коментирал еден миленијалец на Reddit.
Проблем на работното место
Несоодветното телефонско однесување станува уште еден фактор зошто Генерација Z има предизвици при адаптација во канцелариско работење, пишува новинарката Пилита Кларк за „Financial Times“.
Ситуацијата станала толку сериозна што Мери Џејн Копс, основач на консултантската компанија „The Phone Lady“, почнала да наплатува дури 3.100 долари за обуки на млади вработени кои не знаат како да се однесуваат при телефонска комуникација.
Зошто постои оваа тишина на телефон?
Експертите нудат неколку објаснувања:
- За разлика од претходните генерации, зумерите не пораснале со фиксни телефони, па не ги усвоиле основните правила на телефонскиот бонтон што родителите ги пренеле на миленијалците и генерацијата X.
- За нив, повиците се доживуваат како упад во приватноста, особено во свет каде доминира текстуалната комуникација.
- Многумина признаваат дека причината за молкот е оправдана претпазливост – во време кога постојат сè пософистицирани телефонски измами и гласовни клонирани повици, младите чекаат првиот збор од соговорникот како знак дека не станува збор за измама.
Парадоксално, уште една причина за ова однесување е нивната претерана културна осетливост – некои припадници на Генерација Z сметаат дека ненадеен телефонски повик значи дека лицето што се јавува го цени своето време повеќе од вашето.
Како што изјавил еден млад учесник на обука кај Копс:
„Знаеш, Мери Џејн, ако некој ме повика ненадејно, тоа ми кажува дека не го цени моето време и нема да разговарам со него.“
Извор – bizlife.rs
