Истиот закон налага да се избришат постоечките профили на социјалните мрежи на оние кои се помлади од 14 години. Компаниите кои нема да го сторат тоа можат да бидат тужени во име на детето кое креирало сметка на платформата. На малолетникот може да му биде доделено до 10.000 долари отштета, според Законот. Компаниите кои ќе го прекршат законот може да бидат казнети до 50.000 долари по прекршок и да платат адвокатски хонорари и судски трошоци.
Законот за социјални мрежи како помош на родителите
„На крајот на краиштата, (се обидуваме) да им помогнеме на родителите во воспитувањето на децата во ова тешко опкружување кое сега го имаме и затоа го ценам вложениот труд“ – рекол ДеСантис за време на церемонијата за потпишување на законот. Тој претходно ставил вето на построга верзија на законот која би забранила сметки на социјалните мрежи за деца помлади од 16 години. Тој закон исто така барал од жителите на Флорида да достават лична карта или други идентификациски материјали за да се приклучат на социјалните мрежи, објавил порталот NBC NEWS.
Законот кој стапува на сила во јануари 2025 година, доаѓа во време кога продолжуваат да се засилуваат напорите за регулирање на социјалните мрежи низ САД поради загриженоста на некои родители дека платформите не прават доволно за да ги заштитат нивните деца на интернет. Во декември, повеќе од 200 организации испратиле писмо во кое се повикува лидерот на мнозинството во Сенатот, Чак Шумер, да закаже гласање за Законот за безбедност на децата на интернет, кој се стреми да создаде одговорност или „задолжителна грижа“ за апликациите и онлајн платформите кои препорачуваат содржина на малолетници која може негативно да влијае на нивното ментално здравје.
Во јануари, законодавците ги испитувале извршните директори на TikTok, X и Meta за безбедноста на децата на интернет. Техничките извршни директори повторно ја потврдиле својата посветеност на безбедноста на децата и укажале на различните алатки што ги нудат како примери за тоа како се проактивни во спречувањето на експлоатација на интернет.
Аргументи за и против новиот закон
На социјалната мрежа Quora родителите расправале за добрите и лошите страни на законот. Еден татко напишал: „Мислам дека тоа е одлична идеја, и дека не може да се сети на ниту една мана, само предности, но и додал дека е сигурен дека „не сите родители ќе гледаат идентично како него на новиот закон“.
Една мајка истакнала дека е од голема важност да се воспостави контрола но го ставила под прашање спроведувањето на забраната: „Родителска контрола, да, но целосна забрана? Тој брод веќе отпловил!“, напишала таа.
Тинејџерка од Флорида се вклучила во полемиката со прашање: „Дали родителите ќе бидат одговорни ако се фатат децата во кршење на овој закон“?
