Франција започна со воведување нови мерки против ultra-fast fashion индустријата, со цел да го ограничи бизнис-моделот заснован на огромни количини евтина облека што се произведува и продава по исклучително ниски цени.
Новата давачка, која стапи во сила на 1 септември, првенствено се однесува на големи платформи како Shein, Temu и AliExpress, кои во последните години значително ја зголемија продажбата во Франција и низ Европа.
Мерката е дел од закон што францускиот парламент го усвои во јуни, а со кој се воведуваат правила за компании што пласираат големи количини облека по многу ниски цени.
Колкава ќе биде давачката?
Висината на давачката ќе зависи од тоа дали одреден производ спаѓа во категоријата ultra-fast fashion, а проценката се заснова на два критериуми – количината облека што компанијата ја пласира на пазарот и трошоците за поправка на облеката во однос на нејзината продажна цена.
Во 2026 година, на пример, давачката ќе изнесува околу 50 евроценти за долна облека, до два евра за маица, девет евра за фармерки и 12 евра за јакна.
Сепак, износот во следните години треба да расте. До 2030 година, давачката би можела да достигне дури 19,50 евра по парче, со ограничување дека не смее да надмине 50 проценти од цената на производот без данок.
Француските власти истовремено развиваат и систем за независно собирање податоци, со цел проценката да се заснова на повеќе извори, а не само на информациите што компаниите самите ги пријавуваат.
Зошто Франција сака да го ограничи ultra-fast fashion моделот?
Ultra-fast fashion во последните години стана еден од најбрзорастечките модели во модната индустрија. Платформи како Shein им овозможуваат на купувачите речиси секојдневно да избираат меѓу илјадници нови производи, често по цени што се толку ниски што поттикнуваат купување поголеми количини облека.
Проблемот не е само во количината произведена облека. Ваквиот модел подразбира и поголема потрошувачка на ресурси, повеќе отпад и пократок животен век на гардеробата.
Францускиот министер за еколошка транзиција Матје Лефевр оцени дека штетните ефекти од ultra-fast fashion индустријата врз животната средина и економијата се добро документирани.
Токму затоа Франција сака да ја промени економската пресметка на овој модел, односно производството и продажбата на огромни количини евтина облека повеќе да не бидат толку исплатливи.
Дали ќе бидат погодени и европските брендови?
Едно од прашањата што ги отвори новата мерка е на кои компании конкретно ќе се однесува.
Француските власти претходно наведоа дека давачката нема да ги опфати големите европски трговци како H&M и Zara, што предизвика критики дека новите прописи построго се применуваат кон кинеските платформи.
Франција, сепак, особено ги издвојува Shein, Temu и AliExpress како компании што придонесоа за експлозијата на ultra-fast fashion моделот.
Европската комисија претходно го постави прашањето за усогласеноста на францускиот закон со правилата на ЕУ, додека Кина ги критикуваше мерките како дискриминаторски и предупреди на можност за трговска реакција.
Нови давачки пристигнуваат и од ниво на ЕУ
Француската мерка доаѓа во период кога и Европската унија се соочува со огромен број мали пратки што пристигнуваат од Кина.
Од 1 јули е воведена посебна давачка од три евра за мали пакети, а француската влада наведува дека по нејзиното воведување испораките на вакви пратки од Кина во ЕУ веќе се намалиле за околу 30 до 40 проценти.
Новите прописи покажуваат дека односот кон ultra-fast fashion индустријата се менува од прашање на личен избор на потрошувачите, таа сè повеќе станува прашање на еколошка политика, регулирање на пазарот и одржливост на производството и потрошувачката.
Извор: odrzime.rs
