Контроверзии околу првата премиера со вештачка интелигенција
Премиерата на „Последниот сценарист“, првиот долгометражен филм целосно напишан од вештачката интелигенција ChatGPT, требаше да се одржи во киното Принц Чарлс во Лондон. Режисерот на филмот, Питер Луиси, изјави за Дејли Бист дека театарот одлучил да го откаже настанот откако добил 200 жалби.
„Бев целосно изненаден, не го очекував тоа“, изјави Луиси. На веб-страницата на театарот, иако настанот беше најавен, деталите и плакатот набрзо беа отстранети, а посетителите преку електронска пошта беа информирани за откажувањето на настанот и враќањето на средствата, но без да се објасни причината за откажувањето.
Филмската индустрија и вештачката интелигенција
„Последниот сценарист“ ја следи приказната за Џек, успешен сценарист кој користи напреден систем за вештачка интелигенција за пишување сценарија. Сценариото за филмот – вклучувајќи го заплетот, ликовите и дијалогот – го напиша ChatGPT, револуционерен чет-бот од OpenAI. Луиси вели дека идејата за филмот била негова и започнала со едноставно барање до ChatGPT: „Напишете заплет за долгометражен филм каде што сценаристот сфаќа дека не е толку добар во пишувањето како вештачката интелигенција“.
Речиси не можеа да поверуваат колку е добро сценариото“, изјави Луиси, зборувајќи за реакциите на актерите. Сепак, тој е свесен дека темата на филмот доаѓа во чувствителен период, особено по минатогодишните штрајкови во Холивуд каде што писателите бараа подобра заштита од вештачката интелигенција која претставува закана за нивните работни места, објави Yahoo News.
Луизи планира да го направи филмот бесплатно достапен онлајн од 11 јули, заедно со документација која покажува како ChatGPT го напишал својот прв долгометражен филм. „Не сакам луѓето да велат: „Вие профитирате од нашата беда и го користите ова како маркетинг алатка за да заработите пари“, рече Луиси. „Сакам да го направам ова како придонес за каузата“.
Додека светот се соочува со брзиот напредок на вештачката интелигенција, останува прашањето како ќе изгледа иднината на филмската индустрија кога вештачката интелигенција ќе стане способна целосно да создава филмови без никакво човечко учество. „Не можеме да го игнорираме, колку и да сакаме“, заклучи Луиси.
