Во протечена снимка од разговорот во јуни, до која дојде Business Insider, извршниот директор на Amazon Web Services, Мет Гарман, наводно им рекол на вработените дека вештачката интелигенција го менува тоа што значи да се биде софтверски инженер, како и нивниот опис на работните задачи.
„Ако погледнеме 24 месеци од сега, или за некое време, не можам точно да предвидам кога, можно е повеќето програмери веќе да не кодираат,“ рекол Гарман, додавајќи подоцна дека улогата на програмерите следната година ќе изгледа поинаку во споредба со 2020 година.
Гарман ја презеде функцијата директор во AWS на 3 јуни, по речиси две децении во компанијата. Тој се приклучи како менаџер на производи со полно работно време во 2006 година, кога AWS имаше само три лица во својот продажен тим ширум светот.
Во разговорот кој протече, Гарман рекол дека иновациите ќе го заменат кодирањето, што значи дека програмерите ќе треба повеќе да размислуваат за конечниот производ.
„Тоа само значи дека секој од нас треба подобро да разбере што бараат нашите корисници и која е крајната цел што ќе се обидеме да ја постигнеме, бидејќи тоа сè повеќе ќе биде суштината на нашата работа, наместо само пишувањето код,“ наводно изјавил, пренесува Entrepreneur.
Извор: Pixabay
Вработени и ВИ
AWS моментално има околу 130.000 вработени, откако отпушти неколку стотици луѓе во април во своите одделенија за продажба, маркетинг и глобални услуги.
Марко Агенти, CIO на компанијата Goldman Sachs, имаше слично мислење во април – само техничките вештини не се доволни за управување со вештачката интелигенција.
За да одржи чекор со технологијата, Агенти ги охрабруваше идните инженери, вклучувајќи ја и неговата ќерка, покрај инженерството да студираат и филозофија.
Според Агенти, филозофијата би им овозможила на инженерите способности за расудување и ментална рамка која ќе им помогне да го следат развојот на вештачката интелигенција, да ги откријат нејзините „халуцинации“ и да ги оспорат резултатите.
