AI системи на иднината и персонализација
За сега, алгоритмите како оние на Netflix и Spotify се обидуваат да ги погодат нашите преференции, често на основа на еден погрешен клик. Сепак, идните генерации на AI системи би можеле да нé познаваат толку добро што би ни нуделе, на пример, „комедија за инвазија на вонземјани во стилот на педесетите, со хаска како главен јунак и изненадувачки длабока карактеризација“ – забава осмислена специјално за вас, или барем така изгледа.
Во дигиталните книги, AI може да го менува текот на приказната според вашето расположение. Ако романот ве губи, можеби досадниот политички дијалог ќе го замени неочекуван напад од змеј. Во семејните филмови, алгоритмот може да ги намали страшните звуци ако почувствува дека младите гледачи се исплашени. А ако сте тип кој секогаш го предвидува крајот на крими сериите, AI ќе вметне лажен траг само за да ве предизвика.
Персонализирана кинематографија
Кинематографијата ќе стане персонализирана: со вашата согласност, AI може да го вметне вашето лице во кадар или да додаде локални елементи во сцените, како на пример познатиот бар каде што одите на пијачка. Дури и реакциите на публиката за време на проекцијата можат да влијаат на текот на филмот. „Ако не поверуваат во заплетот, следува алтернативен крај или планот Б“, гласи една од предложените идеи во текстот.
Во видео-игрите, одредени ликови веќе нема да бидат само статисти со претходно снимени три реченици. Тие ќе ги паметат вашите избори, ќе ви замерат за грешките и можеби ќе покренат свој клубски состанок без вас. Вашиот аватар ќе реагира емотивно, а AI ќе креира предизвици според вашиот стил на игра, дури и ќе се потруди да внесе непланиран хумор.
Забавата сè повеќе ќе ја вклучува и самата публика. Ако вашата идеја за пресврт во заплетот ја зголеми гледаноста, можете да се најдете во делот „Благодарност до гледачот од ред Г“, или пак да добиете „наративен бонус“. Авторските права ќе станат нов правен предизвик, бидејќи се отвора прашањето кој е творецот ако AI ја користи вашата сугестија.
Концептот на трансмедијално раскажување на приказни добива сосема ново значење: приказната може да започне во е-книга која реагира на тоа како сте станале тој утро, да премине во интерактивна игра, а да заврши во вечерната серија на вашиот телевизор и сето тоа под раководство на AI асистент кој ве познава подобро од вас самите.
„Автентичноста веќе не е одлука на брендовите за тоа кои карти да ги откријат, туку стана неизбежна сила која ја поттикнува јавноста“, изјави Рејли Њуман од компанијата Motif Brands.
И додека некои се плашат од непосакувани импликации, поголемиот дел од стручњаците се согласуваат дека AI нема да ја замени човечката креативност, туку ќе ја надгради, трансформирајќи ја забавата од линеарен формат во постојана, персонализирана интеракција помеѓу технологијата и човекот. Заклучокот е јасен, забавата на иднината сè помалку наликува на снимен програм, а сè повеќе на импровизирано кабаре во кое сите, сакале или не, стануваме дел од актерската постава.
Извор: web-mind.rs
