Најновото ажурирање на GPT-4o донесе низа практични подобрувања, вклучувајќи попрецизно прикажување на текст и способност да следи покомплексни и подетални барања на корисниците. Сепак, како што е наведено во објавата на OpenAI, моделот бил обемно трениран на „огромен спектар на стилови на слики“, што ги воодушеви корисниците со неговата способност да генерира статични слики и видеа што потсетуваат на нивните омилени анимации – од South Park до класична stop-motion анимација.
ВИ ги реинтерпретира познатите сцени од Ghibli
Еден стил, сепак, брзо доминираше на X и Instagram: корисниците на ChatGPT (и сервисот за генерирање видео на OpenAI, Sora) почнаа да го рекреираат стилот на култното јапонско студио Studio Ghibli, познато по филмови како Spirited Away и Howl’s Moving Castle. Некои го користеа овој стил за реинтерпретација на познати сцени од поп-културата и политиката, вклучувајќи го новиот трејлер за Господарот на прстените: Дружината на прстенот, сцени од The Sopranos, како и реален момент на напната размена помеѓу Доналд Трамп, Џеј Ди Венс и украинскиот претседател Володимир Зеленски во Белата куќа.
Не е изненадување што некои од највиралните објави го претставија Ghibli стилот во форма на мемиња, вклучувајќи ги популарните „distracted boyfriend“, „bro explaining“ и познатата фотографија на Бен Афлек како пуши цигара. Еден од најсподелуваните постови на X го прикажуваше сопственикот на платформата, Илон Маск, како си игра со прибор за јадење – слика инспирирана од неодамнешно видео каде што милијардерот балансира лажици за време на вечера организирана од Трамп во Њу Џерси.
Во меѓувреме, на интернет се споделува и видео од 2016 година, во кое Хајао Мијазаки, ко-основачот на Studio Ghibli, ја опишува ВИ-генерираната уметност како „навреда за самиот живот“. Мијазаки е познат по својата рачно цртана анимација и педантното обликување на секој кадар.
„Потполно сум згрозен. Ако навистина сакате да создавате морничави нешта, повелете, но јас никогаш не би ја вклучил оваа технологија во мојата работа.“
Новата ВИ алатка на OpenAI повторно ја разгоре дебатата околу улогата на вештачката интелигенција во уметноста. Овие полемики доаѓаат само неколку недели по отвореното писмо потпишано од речиси 4.000 луѓе, во кое се бара од аукциската куќа Christie’s да ја откаже својата прва аукција посветена исклучиво на ВИ-уметност, поради загриженоста дека ВИ моделите се обучени врз дела заштитени со авторски права и дека експлоатираат човечки уметници.
Генералниот директор на OpenAI, Сем Алтман, се пошегува на оваа тема на мрежата X, пишувајќи дека, по „деценија обиди да помогне во создавањето на суперинтелигенција што ќе го излечи ракот или што и да е“, токму Ghibli сликите му донеле вирално внимание.
„Првите 7,5 години никому не му беше грижа, потоа 2,5 години сите ве мразат за сè“, напиша Алтман. „Едно утро се будите и добивате стотици пораки: ‘Погледни, те направив во Ghibli стил, хаха’“.
Како и кај повеќето уметнички дела генерирани со вештачка интелигенција, овие слики отвораат низа прашања за авторските права – не само во врска со работата на Studio Ghibli, туку и со оригиналните слики што биле реинтерпретирани.
Извор: Web-mind.rs
