Кратката снимка прикажува група кучиња во Кина кои наводно биле фатени за консумација, но успеале да побегнат и тргнале на долг пат кон дома како весела дружина, меѓу нив златен ретривер, повреден германски овчар и храбро корги кое ја предводи групата.
Проблемот е: тоа не е вистина. Иако оригиналната снимка е автентична и прикажува седум кучиња како лутаат покрај автопат во провинцијата Џилин, кинеските државни медиуми подоцна ја демантираа приказната за нивното бегство од кланица. Сепак, измислената верзија продолжи да живее свој живот преку AI генерирани постери, трејлери и лажни слики од нивното „враќање“.
Како настана лажната приказна?
Видеото го снимил возач на 15 март во оддалечен дел на провинцијата Џилин. Тој го објавил со претпоставка дека кучињата можеби испаднале од некое возило, но подоцна појасни дека не видел никакво бегство.
Снимката експлодираше на кинеските мрежи Douyin и Weibo, а потоа стана глобална на TikTok и Instagram. Се појавија теории дека кучињата се украдени и дека го штитат повредениот член во средината. Вистината е многу помалку романтична.
Вистинската приказна
Сите кучиња им припаѓаат на мештани кои живеат само неколку километри од местото каде што се снимени. Германскиот овчар бил во период на парење, поради што останатите кучиња го следеле. Повеќето кучиња во тоа село слободно се движат и често исчезнуваат на ден-два во вакви периоди. Седумте кучиња во меѓувреме сами се вратиле дома.
Зошто веруваме во вакви вести?
Според експертите, ваквите снимки ја погодуваат нашата емотивна страна и потребата да се грижиме за животните. Тие нудат бегство од реалноста, но нивната популарност ги поттикнува креаторите да измислуваат содржини за прегледи.
„Вниманието е пари на интернетот. Колку повеќе внимание, толку повеќе интеракција и заработка“, вели ТЈ Томсон, професор по дигитални медиуми.
Лов на кликови и опасностите од AI
Проблемот со ваквите „безопасни“ дезинформации е што тие го слабеат нашето критичко размислување. Професорот Тама Ливер предупредува: „Кога ќе ги спуштиме критериумите за вистина во еден случај, нашата способност да препознаеме лага опаѓа и кај посериозни теми, како што се војните или политиката.“
Дополнително, оваа конкретна приказна подгреа и расистички стереотипи за кинеската култура и исхрана, што покажува дека дури и видеата со животни можат да имаат негативни општествени последици кога се зачинети со лаги.
Во ера каде AI содржините се сеприсутни, границата помеѓу вистината и измисленото станува сè помаглива. Овој случај со „хероите на четири шепи“ е потсетник дека на интернетот секогаш треба да го провериме изворот пред да го подариме своето срце (или клик) на некоја приказна.
Извор: odrzime.rs
