Компанијата Foundation Future Industries, основана во 2024 година во Сан Франциско, развива автономни хуманоидни роботи наменети за воена и индустриска употреба. За разлика од повеќето конкуренти кои се фокусираат на домашните обврски и услужниот сектор, целта на оваа компанија е роботите да ги преземат опасните задачи во фабриките, логистиката и, потенцијално, на боиштата.
Нивните роботи веќе се тестирани во Украина, а компанијата планира во наредните година и половина да ја понуди оваа технологија и на американската војска.
Од финансиски стартап до воена роботика
На чело на компанијата се наоѓа Санкает Патак, претприемач кој претходно ја водеше финтек платформата Synapse. По нејзиниот банкрот во 2024 година, Патак заедно со партнерите започна нов проект фокусиран на хуманоидна роботика.
„Убеден сум дека технологијата достигнува ниво на кое може да ги замени луѓето во работи кои се опасни по живот. Ако успееме во тоа, тоа ќе биде една од најкорисните примени на роботиката“, вели Патак.
Компанијата се издвојува меѓу бројните производители на хуманоидни роботи токму поради тоа што отворено зборува за воената примена на својата технологија.
Првите тестови во Украина
Глобалното внимание Foundation го привлече на почетокот на годинава, кога во Украина испрати два роботи од моделот Phantom MK-1. Компанијата тврди дека ова е прв познат случај на тестирање хуманоидни роботи во воена зона.
Тестовите, спроведени во соработка со украинските власти и со поддршка на американската влада, беа фокусирани на логистички задачи во опасни подрачја. Според наводите на компанијата, роботите покажале потенцијал за преземање работи како што се достава на опрема и подигнување залихи од ризични локации, со што би се намалила изложеноста на војниците на опасност.
Сепак, моменталната генерација роботи е сè уште далеку од сценаријата во научно-фантастичните филмови. Phantom MK-1 може да носи товар од само околу 20 килограми, не е целосно отпорен на вода и има ограничено траење на батеријата. Поради тоа, Foundation веќе работи на нова верзија, Phantom 2, за која тврдат дека ќе има „надчовечки способности“ и двојно поголем капацитет за носење товар.
Синот на Трамп во тимот
Дополнително внимание компанијата привлече кога за главен советник за стратегија го ангажираше Ерик Трамп, синот на актуелниот американски претседател.
Според наводите на компанијата, Ерик Трамп претходно бил инвеститор во Foundation, а сега ќе помага во развојот на стратегијата и ширењето на бизнисот. Овој потег предизвика политички реакции. Демократската сенаторка Елизабет Ворен ја критикуваше соработката, наведувајќи дека блиските врски на компанијата со администрацијата би можеле да претставуваат конфликт на интереси.
Нова ера на војување
Foundation веќе има добиено договори за истражување од американската влада вредни вкупно 24 милиони долари за тестирање роботи во работи кои вклучуваат инспекција, логистика и ракување со оружје за потребите на копнената војска, морнарицата и воздухопловството.
Компанијата отворено истакнува дека нејзината цел не е само комерцијален успех, туку и технолошка предност на Соединетите Американски Држави во однос на Кина.
„Сакаме на американската војска да ѝ ги испорачаме најдобрите роботи што можеме да ги направиме подобри од сè што Кина моментално има“, порачува Патак.
Дали нè очекуваат „Терминатори“?
Иако идејата за хуманоидни роботи на бојното поле звучи како сцена од филмот Терминатор, експертите сметаат дека реалноста сепак е нешто поинаква. Предноста на хуманоидните роботи е што можат да се движат низ средини кои се дизајнирани за луѓе – скалила, ходници, подруми или градежни објекти.
Меѓутоа, бројни експерти предупредуваат дека хуманоидните системи се сè уште многу поскапи и посложени за производство од другите воени роботи, како што се дроновите или возилата на гасеници.
„Војната во Украина покажа дека најважни се брзината на прилагодување и евтиното производство. Да се прави робот кој изгледа како човек е многу скап и комплициран инженерски предизвик“, смета Мелани Сисон.
Покрај техничките прашања, остануваат и етичките дилеми. Критичарите предупредуваат дека роботите кои самостојно носат одлуки во борбени ситуации би можеле да отворат сосема нови прашања за одговорноста и контролата. Сепак, експертите главно се согласуваат во едно: вештачката интелигенција и автономните роботи ќе станат составен дел од војувањето во иднина.
„Очекувам дека роботите на копно, во воздух и под вода постепено ќе ги заменуваат човечките војници“, вели Тоби Волш, но додава и важна напомена: „Тоа не значи дека наскоро ќе гледаме хуманоидни Терминатори како маршираат по боиштата. Тоа за сега е повеќе научна фантастика отколку реалност.“
Извор: webmind.mk
